Prishtinë, 22 gusht 2025 (MIA) - Ambasadat e Francës, Gjermanisë, Italisë, Mbretërisë së Bashkuar dhe SHBA-së, së bashku me Zyrën e BE-së në Kosovë, kanë shprehur shqetësim lidhur me siç thonë ata "përpjekjet për të kufizuar konkurrencën mes partive që përfaqësojnë komunitetet joshumicë para zgjedhjeve lokale të 12 tetorit".

Shtetet e KUINT-it dhe BE theksojnë se çdo veprim për të përjashtuar komunitete të caktuara minon parimet demokratike dhe gërryen besimin në institucionet e Kosovës.

"Ne presim që qeveria në detyrë dhe të gjitha partitë politike të përmbahen nga hapat e mëtejshëm që mund të pengojnë regjistrimin e partive", thuhet në reagim. 

Sipas ambasadës së Francës, Gjermanisë, Italisë, Mbretërisë së Bashkuar, Shteteve të Bashkuara, dhe Zyrës së BE-së në Kosovë, të gjitha procedurat duhet të kryhen në përputhje të rreptë me rregullat dhe mandatin e Komisionit Qendror të Zgjedhjeve.

"Në të njëjtën kohë, ne inkurajojmë partitë e prekura të shfrytëzojnë plotësisht Panelin për Ankesa dhe Parashtresa Zgjedhore për të kërkuar zgjidhje", përfundon reagimi.

Komisioni Qendror i Zgjedhjeve dje nuk certifikoi Listën Serbe për zgjedhjet lokale të 12 tetorit. Rekomandimi për certifikimin e Listës Serbe i mori vetëm 2 vota për, 2 kundër dhe 7 abstenime. mb/