Скопје, 20 февруари 2025 (МИА) - Возач на товарно моторно возило, државјанин на Косово, се обидел преку ГП „Деве Баир“ да криумчари разни лекови и анаболични стероиди, од кои 126 кутии со вкупно 1.260 ампули Equiamax B200 200mg-1ml, Decamax D200 200mg-1ml, Testomax E250 250mg-1ml, Testomax C200 200mg-1ml, Primomax P100 100mg-1ml, 50 флакони Gemtu 1000mg-10ml, како и 49 кутии со вкупно 4.410 таблети Andromax Oxymetholone 25mg и Danamax Methandrostanolone 10mg.

Како што информира денеска Царинската управа, лицето е откриено при контрола на возилото од страна на мобилен царински тим. Лековите се откриени во ќеса скриена со ќебе и јакна, во фиоката над воланот и во сандакот со алат. Вкупната вредност на лековите е 788 илјади денари. Против сторителот е поднесена кривична пријава до ОЈО Куманово.

Кривична пријава е поднесена и до ОЈО Гевгелија против државјанин на Иран заради основано сомнение за сторено кривично дело „вршење јавен превоз без поседување на лиценца“. Сторителот, кој управувал со товарно моторно возило натоварено со производи за увозник од Скопје на граничниот премин „Богородица“, покрај останатите документи, приложил и фалсификувана поединечна транспортна дозвола. 

- Кривична пријава до ОЈО Гевгелија е поднесена и против две лица, едно правно и едно одговорно лице во транспортна компанија заради основано сомневање за сторено кривично дело „фалсификување исправа“, казниво по член 378 од Кривичниот законик. Одговорното лице во транспортната компанија направил лажна исправа „извод од лиценца за вршење на јавен превоз во меѓународен патен сообраќај“ при што од својот компјутер во делот за регистарски ознаки ги променил ознаките на возилото и впишал регистарски ознаки на друго возило. Лажната исправа ја ставил во кабината на товарното моторно возило, која подоцна е приложена од возачот на излез од државата на граничен премин „Богородица“, при транспорт на стока. Царинските службеници се посомневале во автентичноста на дозволата и случајот е предаден на Секторот за контрола и истраги, кој изврши проверка на исправата со надлежни институции, при што е утврдено дека исправата е фалсификувана, се вели во соопштението.

Кривична пријавa е поднесена и против македонски државјанин кој се обидел да криумчари стока во вредност од 826.400 денари, за кои требало да плати увозни давачки од 155.232 денари. Станува збор за рачка за епилатор „Elysion applicator“ која е пронајдена во картонска кутија сместена меѓу предните и задните седишта на автомобил со македонски регистарски таблички, со кој сторителот се пријавил за влез на граничниот премин „Деве Баир“.

Службата за мобилни скенери на влез во државата на граничен премин „Табановце“ запленила разна стока, меѓу која четири инвертери за соларни системи, 150 парчиња лакови за нокти од 10 мл и 20 парчиња серум за кожа од 30 мл, која македонски државјанин, кој патувал со автомобил со германски регистарски таблички, се обидел да ја криумчари во државата.

Царинските службеници на граничниот премин „Табановце“ заплениле топлинска пумпа BOSCH (внатрешна и надворешна единица со заштитни маски). Македонски државјанин, кој патувал со автомобил со австриски регистарски таблички, се обидел да ја шверцува во државата без да плати увозни давачки.

Запленети се 3.300 евра, откриени при личен претрес на патник, македонски државјанин, кој со автомобил со македонски регистарски таблички, се пријавил за излез од државата на граничниот премин „Богородица“. Патникот пријавил дека со себе носи 2.500 евра, но при извршената контрола, во џеб од неговата јакна, биле пронајдени 5.300 евра за кои не поседувал документ за потекло. Согласно законските прописи, на патникот му биле вратени 2.000 евра, износ што резидент може слободно да го изнесе од државата, а за сторениот девизен прекршок ќе биде поведена прекршочна постапка.

Мобилен царински тим запленил и 31 пар патики со вкупна вредност од 137 илјади денари. Производите биле пронајдени во ќеси и торби сместени на задното седиште и во багажникот на автомобил со бугарски таблички, со кој македонски државјанин се пријавил за влез во државата на граничниот премин „Табановце“.

Вкупно 1.320 ремчиња за рачни часовници се пронајдени во два куфери и ранец на македонска државјанка, која патувала со автобус кој сообраќал на релација Истанбул-Скопје. Непријавените производи се откриени при контрола на автобусот на влез во државата на граничниот премин „Деве Баир“.

- 42 парчиња делови за возила, со вкупна вредност од 302 илјади денари се откриени од Службата за мобилни скенери, при контрола на товарниот дел на два камиони со македонски регистарски таблички, управувани од македонски државјани, на влез во државата на граничниот премин „Табановце“, автопат. Во првиот случај, се пронајдени 13 употребувани гуми за камиони, 4 употребувани гуми со алуминиумски бандажи за автомобили, 4 задни светла и 13 хидраулични пумпи за камиони, а во вториот случај се пронајдени 4 употребувани гуми со алуминиумски бандажи и 4 нови гуми за автомобили, се вели во соопштението од Царинската управа. мд/бак/

Фото: Царинска управа