Велес,14 април 2026 (МИА) – Првиот состав на Ансамблот „Керамичар“ од Велес за кореографијата „Лазаренки“ ја освои втора награда во силна конкуренција од 21 ансамбл од Македонија, Хрватска и Косово на 22. Меѓународен фолклорен изворен фестивал „Велигденски средби“ што  се одржа во селото Ораовица кај Радовиш. За наградата одлучила меѓународната жири комисија составена од членови од Македонија, Хрватска, Бугарија и Косово.

Томе Јаневски,претседател на управниот одбор на „Керамичар“ денеска за МИА информира дека се среќни со освојување на втората награда во силна конкуренција на овој фестивал, на  кој учествувале повеќепати, а во 2019 година биле првопласирани.

-Настапивме со кореографијата „Лазаренки“ со носија и игра од реонот на селото Бојмија, гевгелиско, која е дел од македонската традиција посветена на верскиот празник Лазарица што се слави една недела пред Велигден. Затоа орото се вика „Лазаренки“, а играорките беа облечени во богата живописна носија со парички на главата од селото Бојмија која пред некоја година ја купи Ансамблот „Керамичар“.

-Оваа кореографија е интересна за играње и привлечна за публиката во земјава, а посебно на гостувањата во странство и секогаш сме наградено со долги и силни аплаузи, појасни Јаневски.

Воедно најави дека по овој настап Ансамблот „Керамичар“ продолжува со напорни вежби и подготовки за настап на други фестивали во земјава и странство.ад/вј/

Фото :Ансамбл „Керамичар“