Нотингем, 13 јануари 2025 (МИА) - Нотингем Форест има сезона од соништата во англиската Премиер лига под водство на Нуно Еспирито Санто, но менаџерот очекува тимот да продолжи да се развива и да игра уште подобро. Следниот натпревар на Форест е против лидерот во лигата Ливерпул во вторник во 21 часот по наше време.

Форест, кој за влакно избегна испаѓање минатата сезона, се изедначи на второто место во поредокот со Арсенал и двата тима заостануваат само шест бода зад Ливерпул.

-Нашите играчи се целосно посветени на каузата и се справуваат одлично. Што може да се случи во иднина? Немам начин да знам. Сепак, имаме резултати од првата полусезона и од нив можеме да процениме дека во моментов се справуваме добро. Мислам дека одиме само во нагорна насока. Искрено верувам дека како одминува времето, оваа група играчи станува се посилна, изјави Еспирито Санто, цитиран од медиумите на Островот.

Додека медиумите во Англија се зафатени со прогнози за тоа колку долго може да трае серијата на Форест, менаџерот на тимот размислува само за работите што може да ги контролира. Ова ги вклучува претстојните натпревари и трансфери во текот на зимскиот прозорец.

-Не можам да трошам време размислувајќи за тоа што може или не може да се случи. Само се подготвуваме и ќе видиме колку повеќе можеме да постигнеме. Што се однесува до пазарот, не можеме а да не учествуваме на него. Немате право да бидете пасивни таму. Сепак, трансферите во јануари се многу тешки, додаде менаџерот на Форест. дс

Фото: Архива