Shkup, 23 janar 2026 (MIA) - Komisioni kuvendor për Çështje të Zgjedhjeve dhe Emërimeve sot e zgjodhi ministrin e Çështjeve Evropiane, Bekim Sali për anëtar të Këshillit Kombëtar për Eurointegrime, ndërsa e konfirmoi edhe propozimin për anëtarë të Komisionit për Parandalim dhe Mbrojtje nga Diskriminimi.

Anëtarët e Komisionit, njëzëri e zgjodhën ministrin e ri të Çështjeve Evropiane, Bekim Sali, si anëtar të Këshillit Kombëtar për Eurointegrime, në vend të ish-ministrit të Çështjeve Evropiane, Orhan Murtezani.

Në seancën e sotme u pranua kërkesa e Mile Stojanovski për tërheqjen e kandidaturës së tij për anëtar të Komisionit për Parandalim dhe Mbrojtje nga Diskriminimi dhe në vend të tij u propozua Linko Bejzarovski. Me këtë ndryshim, Kuvendit iu dorëzua një listë e përditësuar e kandidatëve, e cila tani përfshin: Linko Bejzarovski, politolog i diplomuar dhe doktor i shkencave historike nga fshati Pllasnicë; Natasha Amdiu, juriste e diplomuar dhe magjistre e shkencave juridike nga Berova; si dhe Gjihan Ahmed, jurist i diplomuar dhe magjistër i shkencave juridike nga Shkupi.

Shtesë, Komisioni konstatoi se pas shpalljes publike për zgjedhjen e drejtorit dhe zëvendësdrejtorit të Agjencisë për Mbrojtjen e së Drejtës për Qasje të Lirë në Informata me Karakter Publik, u paraqitën vetëm dy kandidatë, dhe njëri prej tyre nuk dorëzoi dëshmi se ka të paktën tetë vjet përvojë pune në fushën e informimit dhe shkencave juridike.

Për këtë arsye, Komisioni kuvendor vendosi që thirrja të anulohet, ndërsa në periudhën e ardhshme do të shpallet një thirrje e re publike për zgjedhjen e drejtorit dhe zëvendësdrejtorit të Agjencisë për Mbrojtjen e së Drejtës për Qasje të Lirë në Informata me Karakter Publik. ls/

Foto: Printskrin