Дебар, 27 февруари 2026 (МИА) - Амбасадорот на Република Турција во Скопје, Фатих Улуцој, денеска престојуваше во посета на  Дебар.

-На средбата со градоначалникот  Фисник Меља,  разговараа за одличните односи меѓу двете пријателски земји, можностите за продлабочување на институционалната соработка, како и за конкретни проекти од заеднички интерес, особено во областа на културата, образованието, туризмот и локалниот развој, информираа од општината.

Во рамки на престојот во Дебар, амбасадорот присуствуваше во петочната молитва,  џума-намаз,  во централната џамија  "Хаџи Вехби Дибра", еден од најзначајните верски објекти во градот.

-Посетата продолжи со обиколка на неколку значајни споменици и карактеристични точки од културното наследство на Дебар, меѓу кои градскиот амам кој сега етнолошки музеј, старите традиционални дебарски куќи, како и Хинќар џамијата, при што одблиску се запозна со историските, архитектонските и духовните вредности што го карактеризираат нашиот град.

-Општина Дебар изразува благодарност за посетата на Неговата Екселенција и ја потврдува својата подготвеност за понатамошно зајакнување на соработката со Република Турција, во интерес на граѓаните и заедничкиот развој, наведуваат од општината. вт/аа/

Фото: Општина Дебар