Мелбурн, 23 декември 2024 (МИА) – Најдобриот австралиски тенисер Алекс де Минаур и британската тенисерка Кејти Болтер објавија денеска веридба.

Болтер на социјалните мрежи сподели фотографија на која таа и Де Минаур ја прославуваат својата веридба, со натпис: „Чувавме мала тајна …“. Тие се во врска од март 2022 година.

Сонародникот на Де Минаур, Танаси Кокинакис кратко ја коментираше веста: „Време беше!“

Инаку и двајцата имаат успешна сезона зад себе. Болтер е најдобро рангираната британска тенисерка, која освои титули на турнирите во Сан Диего и Нотингем и ја заврши годината на 23-то место на ВТА ранг-листата.

Де Минаур оваа сезона беше шести на АТП-листата и за првпат во кариерата играше во четвртфиналето на Ролан Гарос, Вимблдон и УС Опен, а за првпат учествуваше и во финалето на АТП.

На Вимблдон, Болтер и Де Минаур играа заедно во мешани двојки, а можно е да играат меѓу себе во Купот на Јунајтед кој започнува на 27 декември (до 5 јануари), бидејќи Австралија игра против Велика Британија, два дуели во сингл и мешан двојки. ег

ФОТО: Фејсбук