Бејрут, 18 октомври 2024 (МИА) - Либанскиот премиер Наџиб Микати денеска изјави дека го отфрла иранското мешање во либанските работи, откако претседателот на иранскиот парламент Мохамад Бејкер Галибаф изјави дека Техеран е подготвен да преговара со Франција за спроведување на резолуцијата на ОН поврзана со јужен Либан.

Резолуцијата 1701 на ОН, усвоена во 2006 година, повикува граничната област на јужен Либан да биде ослободена од оружје или трупи различни од оние на либанската држава, со цел да се зачува мирот на границата со Израел.

-Изненадени сме од овој став, кој претставува отворено мешање во либанските работи и обид да се воспостави отфрлено старателство над Либан, рече Микати, соопшти либанската влада.

Микати додаде дека преговорите за спроведување на резолуцијата 1701 на ОН се работа на либанската држава. Според резолуцијата 1701, Советот за безбедност на ОН ја овласти мировната мисија на ОН (УНИФИЛ) да им „помогне“ на либанските сили да се осигураат дека јужен Либан е „ослободен од каков било вооружен персонал, имот и оружје, освен оние на либанската влада“.

Израел рече дека либанската армија и УНИФИЛ не успеале да ја обезбедат областа. Израел започна копнена операција во Либан на 1 октомври по речиси една година тековни непријателства со либанската милитантна група Хезболах, која се одвиваше паралелно со војната во Газа.

Израелскиот премиер Бенјамин Нетанјаху му рекол на генералниот секретар на ОН Антонио Гутереш дека е време УНИФИЛ да се повлече. Мировната мисија во моментов е овластена до 31 август 2025 година. мс/

фото: МИА архива