„Дојче банк“ во вториот квартал од годинава забележа загуба од 143 милиони евра
- Најголемата германска банка „Дојче банк“ денеска соопшти дека забележала загуба од 143 милиони евра во вториот квартал од 2024 година, што претставува нејзина прва квартална загуба од почетокот на 2020 година.
![„Дојче банк“ во вториот квартал од годинава забележа загуба од 143 милиони евра](https://mia.mk/images/20240724155448_big_730x400_40.webp )
Франкфурт, 24 јули 2024 (МИА) - Најголемата германска банка „Дојче банк“ денеска соопшти дека забележала загуба од 143 милиони евра во вториот квартал од 2024 година, што претставува нејзина прва квартална загуба од почетокот на 2020 година.
„Дојче банк“ мораше да издвои 1,3 милијарди евра како мерка на претпазливост за трошоците на долгогодишниот правен спор со акционерите на Постбанк и со тоа го заврши кварталот со загуба, пишува германскиот економски неделник „Виршафтсвохе“.
Што се однесува до оперативното работење, вкупниот приход на банката во вториот квартал од 2024 година е зголемен за два отсто на 7,6 милијарди евра. Особено добри резултати се забележани во инвестициското банкарство, каде приходите се зголемени за девет отсто на годишно ниво на 2,6 милијарди евра. Раст е остварен главно од консултантски услуги и издавање хартии од вредност, што ги удвои приходите.
Вишиот регионален суд во Келн посочи дека може да пресуди во корист на акционерите на „Постбанк“ кои ја тужат „Дојче Банк“ поради наводно недоволна задолжителна отпремнина за малцинските акционери по преземањето во 2010 година. Ако нема вонсудска спогодба, судот во Келн ќе одлучи на 21 август, а „Дојче банк“ се подготвува за најлошото сценарио. рп/
Фото: МИА архива