Gazë, 8 prill 2025 (MIA) - Të paktën 25 persona, mes të cilëve tetë fëmijë dhe pesë gra, janë vrarë në sulmet e mbrëmshme të Izraelit në Rripin e Gazës, njoftoi sot Drejtoria Shëndetësore Palestineze.

 Ndërkohë, Gjykata e Lartë e Izraelit po dëgjon sot dëshminë për tetë raste që kundërshtojnë vendimin e diskutueshëm të kryeministrit izraelit Benjamin Netanjahu për të shkarkuar kreun e agjencisë së sigurisë së brendshme ushtarake Shin Bet.

Izraeli në mars e shkeli armëpushimin me Hamasin dhe ndërpreu dërgimin e ushqimit, karburantit dhe ndihmave humanitare në enklavën e pushtuar palestineze, të cilën grupet e të drejtave të njeriut e quajnë krim lufte. 

 Urdhrat e rinj izraelitë për të zhvendosur palestinezët kanë detyruar qindra mijëra njerëz të largohen nga bombardimet e reja izraelite dhe operacionet ushtarake tokësore.

 Sipas të dhënave të Ministrisë palestineze të Shëndetësisë në enklavën e pushtuar palestineze, gjatë operacionit ushtarak izraelit, i cili po vazhdon prej 18 muajsh, kanë humbur jetën më shumë se 50.000 palestinezë, kryesisht gra dhe fëmijë. Izraeli është zotuar të përshkallëzojë luftën derisa Hamasi të kthejë të gjithë pengjet e mbetura, të çarmatoset dhe të largohet nga Rripi i Gazës.

 Foto: Arkivi i MIA-s