Shkup, 27 tetor 2024 (MIA) - Zëvendëskryeministri i parë dhe ministër i Mjedisit Jetësor dhe Planifikimit Hapësinor Izet Mexhiti, dje mori pjesë në Marshin simbolik organizuar me rastin e muajit të ndërgjegjësimit për kancerin e gjirit.

Siç bëhet e ditur në kumtesën e Lëvizjes Demokratike, ai tha se kjo ishte një ditë e rëndësishme, një thirrje për ndërgjegjësim dhe shpresë, një mesazh solidariteti që na bën për të qëndruar pranë atyre që luftojnë me kurajë.

"Tetori është muaji i ndërgjegjësimit për kancerin e gjirit – një thirrje e fuqishme për tu kujdesur për shëndetin e grave dhe për rëndësinë e diagnostikimit të hershëm. Sot, bashkë me Forumin e Gruas të Lëvizjes Demokratike, u bashkuam në një marsh simbolik për të shënuar këtë muaj dhe për të mbështetur të gjithë ata që përballen me këtë sëmundje", theksoi Mexhiti.

Mexhiti përkujtoi se kontrollet e rregullta dhe zbulimi i hershëm janë hapa vendimtarë në rrugën drejt fitores mbi këtë sëmundje.

Për në fund përçoi porosinë që të kujdesemi, të mbështesim dhe të japim shpresë për çdo grua që sot përballet me këtë sfidë. fc/

Fotografia: Lëvizja Demokratike