Jerusalem, 19 tetor 2024 (MIA) - Më shumë se 50 persona janë vrarë në disa sulme izraelite në Rripin e Gazës në më pak se 24 orë.

Ministria e Shëndetësisë së Palestinës tha se është goditur spitali në Beit Lahia dhe se ushtria kishte qëlluar mbi ndërtesën e spitalit dhe terrenin e saj, duke shkaktuar panik tek pacientët dhe stafi.

Në qendër të Gazës, të paktën 10 njerëz humbën jetën, duke përfshirë dy fëmijë, kur një shtëpi u godit në qytetin Zavajada.

Në një sulm tjetër, 11 persona nga e njëjta familje u vranë në kampin e refugjatëve Magazi.

Gjatë natës, të paktën tre shtëpi u goditën në veri të Gazës, ku jetën e humbën 30 njerëz – më shumë se gjysma e tyre gra dhe fëmijë. Janë goditur shtëpi edhe në Xhabalia ku të paktën 80 njerëz u plagosën.

Sulmet izraelite kanë shkatërruar pjesë të mëdha të Gazës, janë zhvendosur rreth 90 për qind nga 2.3 milionë njerëz, shumica e të cilëve nuk kanë ushqim, ujë, ilaçe dhe karburant.

Një dron i lansuar mëngjesin e sotëm nga Libani goditi rezidencën e kryeministrit izraelit Benjamin Netanjahu.

Sipas ushtrisë izraelite, mëngjesin e sotëm nga Libani janë lëshuar 55 raketa në dy sulme në veri të Izraelit. Disa u kapën, bëri të ditur armata, ndërsa nuk raportohet për viktima.

Ministria e Shëndetësisë së Libanit kumtoi se dy persona u vranë pasi Izraeli qëlloi nga ajri drejt një makine. Nuk dihet se kush ishte në të.

Foto: EPA