Скопје, 22 февруари 2025 (МИА) - Управата за јавни приходи (УЈП) ги повикува сите даночни обврзници да ги достават потребните документи до своите сметководители и навремено да ги поднесат ДДВ-04 пријавите за изминатиот даночен период. Крајниот рок за поднесување на ДДВ-04 пријавата е вторник, 25 февруари.

Според УЈП, до вчера, до крајот на работниот ден, од очекуваните 7 396 ДДВ пријави, поднесени се 1 862 што е 25 отсто од вкупниот број за овој даночен период.

-Ова покажува дека значителен број на обврзници сè уште не ја исполниле својата законска обврска, односно остануваат да се поднесат уште 5 534 ДДВ – 04 пријави. Апелираме, сите даночни обврзници да ги исполнат своите законски обврски навремено, за да избегнат стрес, казни и дополнителни финансиски трошоци. Навременото поднесување на ДДВ-04 пријавата е од исклучителна важност за правилното усогласување со даночните прописи, одржување на финансиската стабилност на бизнисите и за развојот на економијата, наведува УЈП.

Даночните обврзници кои имаат потреба од дополнителни информации или поддршка можат да се обратат на info@ujp.gov.mk или на телефонските броеви 0800 33 000 и 02 3253 200. мч/сст/

фото: МИА архива