Скопје, 30 септември 2024 (МИА) - Министерот за европски прашања Орхан Муртезани денеска имаше средба со новоименуваната амбасадорка на Кралството Холандија во Република Северна Македонија, Узлем Џанел. Муртезани изрази благодарност  за континуираната политичка, економска и развојна поддршка, која што Холандија ѝ ја пружа на Северна Македонија.

Министерството за европски прашања соопшти дека една од клучните теми на средбата беше одличната соработка во рамките на програмата MATRA за владеење на правото, која е од суштинско значење поради нејзиниот фокус на зајакнување на демократијата и владеењето на правото – клучни области за напредокот на Северна Македонија на патот кон членството во Европската Унија. Министерот Муртезани ја нагласи важноста на оваа соработка и го потенцираше позитивното влијание кое таа го има врз реформските процеси во земјата.

Муртезани и Џанел ја разгледаа и успешната соработка помеѓу Северна Македонија и Холандија во рамките на проектите на IPA Twinning. Холандија е водечки партнер во седум од деветте заеднички Twinning проекти меѓу двете земји, покривајќи различни области од заемен интерес. Муртезани ја потврди подготвеноста за продолжување и понатамошно проширување на оваа соработка, вклучително и преку инструментот TAIEX, особено во области кои директно придонесуваат за европската интеграција на земјата, се наведува во соопштението од Министерството за европски прашања.са/дма/

Фото: Министерство за европски прашања