Скопје, 17 јули 2024 (МИА) - Министерот за јавна администрација, Горан Минчев денеска одржа средба со претседателот на Комисијата за спречување и заштита од дискриминација, Игор Јадровски. Примарниот фокус на средбата беше во насока на унапредување и продлабочување на соработката помеѓу двете институции, со цел да работат заедно кон општество ослободено од дискриминација, каде секој поединец има еднакви можности и права.

Минчев ја истакна посветеноста и заложбата на Министерството за поттикнување општество каде секој поединец ќе се третира со достоинство и почит.

-Посветени сме на соработка со Комисијата за справување и спречување на дискриминацијата во сите нејзини форми, посочи министерот.

Претставниците на Комисијата за спречување и заштита од дискриминација ги презентираа неодамнешните наоди и ги истакнаа нивните тековни иницијативи и идни планови. Тие ја истакнаа важноста од континуирана соработка со владините тела за ефективно спроведување на политиките за антидискриминација и промовирање на јавната свест.

Двете страни се согласија за неопходноста од унапредување на јавното образование за прашањата за дискриминација, зајакнување на законските рамки и обезбедување цврсто спроведување на законите за антидискриминација. Тие, исто така, разговараа за потенцијални заеднички проекти и кампањи насочени кон подигање на свеста и негување култура на толеранција и почит.

Министерството за јавна администрација, како што наведува, е посветено на подобрување на ефикасноста и ефективноста на јавните услуги, обезбедување на транспарентност, и промовирање на инклузивно владеење за сите граѓани. мч/нд/

фото: Министерство за јавна администрација