Москва, 14 март 2025 (МИА) - Руските сили за противоздушна одбрана одбија напад од четири беспилотни летала во московскиот регион, пренесоа британските медиуми, цитирајќи го градоначалникот на главниот град Сергеј Собјанин.

Според првичните податоци во овој напад нема повредени. Три од беспилотните летала се соборени на периферијата на Москва, а едно во западниот дел на градот.

„Службите за итни случаи работат на местото каде паднале остатоци“, наведе Собјанин на платформата Телеграм.

Градоначалникот не ја спомна Украина, но од руската инвазија која започна пред повеќе од три години, Киев врши постојани напади со беспилотни летала против Русија, од кои повеќето се насочени кон енергетски објекти, потсетуваат британските медиуми.

Гувернерот на Московската област, Андреј Воробјов, објави дека три од беспилотните летала биле соборени во областите под негова управа во Московската област.

„Урнатините паднаа на градилиште и на станбена зграда во изградба“, додаде Воробјов, истакнувајќи дека нема извештаи за жртви.

Еден од дроновите оштетил покрив на станбена зграда во западниот дел на Москва, јавија руските државни медиуми, повикувајќи се на првични информации од службите за итни случаи.сд/

фото:МИА архива