Вашингтон, 16 декември 2025 (МИА) - Соединетите Американски Држави му понудија на Киев безбедносни гаранции по урнекот на НАТО, бидејќи американските и европските преговарачи објавија напредок во разговорите за прекин на војната на Русија во Украина, но договор за територијални отстапки е сè уште далеку.

Емисарите на американскиот претседател Доналд Трамп ја дадоа безбедносната понуда за време на разговорите со украинскиот претседател Володимир Зеленски во Берлин, изјавија американски претставници, но предупредија дека таков договор нема да биде на маса засекогаш.

Разговорите во германската престолнина предизвикаа оптимизам кај европските лидери за патот кон прекинување на најсмртоносниот конфликт во Европа од Втората светска војна. Но, Москва сè уште не се согласила со ниту една од промените дискутирани во Германија и не покажала подготвеност да го стори тоа.

„Се обидуваме да го завршиме тоа“, рече Трамп, зборувајќи во Белата куќа за договор за прекин на војната. „Имавме бројни разговори со претседателот на Русија (Владимир) Путин и мислам дека сега сме поблиску од кога било досега и ќе видиме што можеме да направиме“, додаде тој.

Европските лидери претпазливо го поздравија поместувањето на администрацијата на Трамп во безбедносните гаранции за Украина.

„За прв пат од почетокот на војната, можноста за прекин на огнот е замислива“, изјави германскиот канцелар Фридрих Мерц, кој беше домаќин на состаноците во Берлин, во објава на „X“.

„Денеска, за прв пат, имав чувство... дека сите се однесуваат како сојузници од истиот табор“, изјави полскиот премиер Доналд Туск за новинарите во својот авион по заминувањето од Берлин. „За прв пат слушнав од американските преговарачи... дека Америка ќе се вклучи во безбедносните гаранции за Украина на таков начин што Русите нема да се сомневаат дека американскиот одговор ќе биде воен доколку Русите повторно ја нападнат Украина.“

Шведскиот премиер Улф Кристерсон рече дека прашањето за безбедносните гаранции станало „појасно и поверодостојно“, што го нарече важен чекор кон одржлив мир. „Но, остануваат многу тешки прашања, не само за териториите, туку и дали Русија воопшто сака мир“, рече Кристерсон во изјава по разговорите во Берлин.

Зеленски по разговорите изјави дека ќе побара од САД да воведат санкции врз Русија и да ѝ обезбедат на Украина повеќе оружје, вклучително и оружје со долг дострел, доколку Москва ги отфрли предлозите што се дискутираат меѓу Киев, Вашингтон и европските лидери.

„Мислам дека Америка ќе изврши притисок со санкции и ќе ни даде повеќе оружје ако тој (Путин) одбие сè“, им рече Зеленски на новинарите. мс/сд/

фото: МИА архива