Рим, 28 август 2024 (МИА) - Пaпата Франциск денеска остро го осуди третманот на мигрантите кои го преминуваат Средоземното Море за да влезат во Европа, велејќи дека одбивањето да им се помогне на мигрантите е „голем грев“.

„Има такви кои систематски и со сите средства работат да не се прифатат мигрантите. А кога тоа се прави свесно и одговорно, тогаш е голем грев“, рече Франциск на аудиенција на плоштадот „Св. Петар“ во Ватикан.

Тој во својот говор повика на проширување на пристапните рути за мигрантите и за „глобално управување со миграцијата засновано на правда, братство и солидарност“, нагласувајќи дека проблемот нема да се реши со „милитаризација на границите“.

Во последниве недели, папата во своите аудиенции ги кажува своите размислувања за католичките духовни прашања.

Меѓународната организација за миграција процени дека од 2014 година, повеќе од 30.000 мигранти исчезнале додека го преминувале Медитеранот. рп/

Фото: МИА архива