Москва, 17 јули 2025 (МИА) - Москва „не попушта пред заканите“, соопшти руското Министерство за надворешни работи денеска, откако американскиот претседател Доналд Трамп ѝ даде на Русија 50 дена да постигне прекин на огнот во Украина и ѝ се закани со санкции.

Трамп во понеделникот го објави својот најцврст став досега за војната во Украина, поставувајќи ултиматум до Москва и ветувајќи нови испораки на ракети и друго оружје за Киев.

Портпаролката на руското Министерство за надворешни работи, Марија Захарова, денеска изјави дека одлуката на Трамп да ја снабдува Украина со нови ракети е сигнал за Киев да „продолжи со крвопролевањето“ и да ги отфрли мировните иницијативи.

-Руската делегација е подготвена да пристигне во Истанбул за трета рунда разговори, рече Захарова, истакнувајќи дека досега не видела никакви сигнали од Киев за подготвеност за разговори.

Захарова додаде дека смета дека е контрапродуктивно да се „мерат во милиметри“ несовпаѓањата во позициите на Белата куќа. мс/

фото: ЕПА