Скопје, 13 декември 2024 (МИА) - Имаме подготвеност за носење на уставните измени, но пораката е јасна, носењето на уставните измени не треба да служи само за отворање на процесот. Ние мора да знаеме дека тој процес ќе заврши и кога. Со ова, настојуваме да го осигуриме процесот од отпочнување до завршување на преговорите, изјави премиерот Христијан Мицкоски во интервју за „Фактор“.

-На ова инсистираме, бидејќи, во случај на повторна блокада понатаму, надежта помеѓу граѓаните ќе се изгуби во голема мера и ќе биде тешко да се убедат граѓаните дека ние еден ден ќе завршиме во Европската Унија. Цврсто веруваме дека овие три фази, извршени со доследност и решителност, на крајот ќе резултираат со напредок, вели Мицкоски во интервјуто. 

Оцени дека неодамнешните состаноци со високите меѓународни претставници ја зајакнале важноста на дијалогот, но, истакнува, дипломатијата во овој случај не е за попуштање под притисок, туку за активно ангажирање на нашите меѓународни партнери за да се осигураме дека перспективата на државата е разбрана.

-Ја истакнавме нашата подготвеност да работиме конструктивно, се додека процесот го почитува нашиот суверенитет и национален идентитет. Додека Бугарија го задржува механизмот за вето, нашите напори се фокусираат на демонстрација дека европската интеграција е стратешка неопходност за стабилноста и просперитетот на регионот. Ја користиме поддршката од сојузниците кои признаваат дека билатералните прашања не треба да ги поткопуваат пошироките цели на ЕУ, нагласува Мицкоски.

Решавање на домашните прашања, додава тој, ја препознава важноста од зајакнувањето на националното единство и внатрешната стабилност.

-Моментално се работи на Патоказот за владеење на правото и Реформа во администрацијата, кои се основи за отворање на кластерот Фундаменти. Овие два патокази очекувам да бидат завршени во следните месеци и со тоа нашата држава и формално правно ќе биде подготвена за отворање на овој кластер. Поддршката од земјите-членки и институциите на ЕУ е клучна, и ние продолжуваме да се залагаме за фер и заснован на заслуги пристап кон пристапувањето, посочува Мицкоски во интервјуто. нд/дма/

Фото: Фактор