Лондон, 12 декември 2025 (МИА) – Кралот Чарлс Трети подели „добри вести“ за неговиот рак, велејќи во лична порака дека раната дијагноза и „ефективната интервенција“ значат дека неговиот третман може да биде намален во новата година.

Во снимена видео-порака емитувана на Канал 4 за кампањата Stand Up To Cancer, Кралот рече: „Овој пресврт е и личен благослов и сведоштво за забележителниот напредок кој е постигнат во грижата за ракот“, пренесе Би-Би-Си.

Веста дека тој добро реагира на третманот е најголемата нова информација за здравјето на кралот откако тој ја откри својата дијагноза во февруари 2024 година.

Типот на ракот не е идентификуван и третманот и мониторингот ќе продолжат, но тој рече: „Раната дијагноза едноставно спасува животи“.

Според Бакингамската палата, закрепнувањето на кралот достигнало многу позитивна фаза и тој „исклучително добро реагирал на третманот“, толку добро што лекарите сега ќе го префрлат неговото лекување „во претпазлива фаза“.

Редовноста на третманот значително ќе се намали – но состојбата на кралот, (77), не е опишана како во ремисија или „излекуван“.

- Денеска можам да ја споделам со вас добрата вест дека благодарение на раната дијагноза, ефективната интервенција и придржувањето кон „докторските наредби“, мојот распоред за третман на рак може да биде намален во новата година“, рече Кралот во својот говор.

Видео-пораката, снимана во Clarence House пред две недели, беше емитувана вечерва во емисијата Stand Up To Cancer на Канал 4, во проект за собирање средства организиран со Cancer Research UK.

Кампањата охрабрува повеќе луѓе да се тестираат за рак и да ги искористат националните програми за скрининг, а пораката на Кралот ја нагласи важноста на проверките за да се открие ракот во рана фаза.

- Знам од лично искуство дека дијагнозата на рак може да биде премногу. Но, исто така знам дека раното откривање е клучот што може да ги трансформира начините на третманот, давајќи непроценливо време на медицинските тимови, рече Кралот. јт/

Фото: ЕПА