Битола, 12 јануари 2025 (МИА) – Градоначалникот на Општина Битола, Тони Коњановски, денеска, изврши увид на активностите и акциите што ги вршат локалните јавни претпријатија задолжени за реализација на програмата на зимската служба во градот.

Екипите задолжени за расчистување на снегот од коловозите, тротоарите, отворените и затворени паркинзи постојано се на терен, а освен локалните комунални јавни претпријатија, координацијата е на највисоко ниво и со „Македонија пат“ кои вршат расчистување на снегот на регионалните патни правци, информираа од Општина Битола.

Во зимската служба и расчистување на сообраќајниците во битолскиот дел на Пелагонија, со своја механизација вклучени се и ЈП Стрежево и АД ЕСМ Молика кои ги расчистуваат патиштата кои се под нивна надлежност.

– Ги повикувам претставниците на зимската служба на организирано и координирано делување, согласно донесената програма и синоќа одржаните координативни состаноци. Покрај расчистувањето, потребно е да се врши и посипување со сол и ризла, порача Коњановски.

Од Општина Битола потврдија дека со механизација се работи на терен и во поранешните општини Бистрица, Цапари и Кукуречани. мт/ра

Фото: Општина Битола