Скопје, 9 февруари 2026 (МИА) - Членовите на Државната изборна комисија (ДИК) одржаа работен состанок со претставници на Меѓународната фондација за изборни системи (ИФЕС), на кој беше потврдена подготвеноста за продолжување и продлабочување на соработката во рамки на програмата „Поддршка на изборите во Северна Македонија“.

Како што соопшти ДИК, директорката на Канцеларијата во Република Северна Македонија, Јоана Косма,  истакна дека соработката со ДИК преку проектот на Владата на Швајцарија „Програма за поддршка на изборите во Северна Македонија“ досега резултирала со конкретни и мерливи постигнувања, особено во развојот на ИТ-решенија, јакнењето на институционалните капацитети, унапредувањето на изборните процеси и зголемена доверба на граѓаните во нив.

-Претседателот на Државната изборна комисија, Бојан Маричиќ, нагласи дека во текот на неговиот мандат приоритет ќе бидат зајакнувањето на кредибилитетот и видливоста на ДИК, како и нејзината отвореност кон граѓаните. Во таа насока, тој рече дека новиот состав на Комисијата ќе продолжи со реформските процеси со јасно дефиниран фокус на клучните стратешки приоритети, меѓу кои потенцирана беше потребата од ставање во функција на Центарот за континуирана обука на ДИК. Маричиќ укажа дека Центарот за обуки веќе има воспоставена законска основа и дека во следниот период, во соработка со ИФЕС, ќе се вложат напори за негово целосно оперативно функционирање, вклучително и обезбедување соодветен кадар, се наведува во соопштението. 

Потпретседателот на ДИК, Абдуш Демири, во текот на дискусијата се осврна на значењето на човечките ресурси и континуираната едукација како клучен елемент за одржливост на реформите.

-Членовите на Комисијата, кои и во претходниот состав учествувале во работата на ДИК, на состанокот ги посочија досегашните искуства од соработката со ИФЕС, нагласувајќи ја важноста од надградување на постигнатите резултати и обезбедување континуитет во реформските процеси. На состанокот беше заеднички констатирано дека партнерството меѓу ДИК и ИФЕС останува стратешко и во наредниот период, со цел унапредување на изборните процеси и зајакнување на довербата на граѓаните во изборниот систем, наведува ДИК. хс/лв/

Фото: Државна изборна комисија