Ријад, 1 јануари 2025 (МИА) - Тренерот на Аталанта, Џан Пјеро Гасперини, на својата прес-конференција пред дуелот со Интер, ја изрази својата почит кон противникот и ја истакна важноста на утрешното полуфинале на италијанскиот Суперкуп во Саудиска Арабија.

-Ова е важен натпревар по нашата одлична серија во лигата. Ќе биде и поинаков натпревар, кој е елиминациски, но ќе се игра за 90 минути, па мораме да гледаме од друга перспектива. Во последните три години Интер е најсилниот тим. Нашите последни два натпревари со нив беа најтешки, но другите беа порамномерни. Мораме да внимаваме да не страдаме премногу на почетокот и да останеме подолго во игра. Кога Интер ќе поведе, станува тешко да се стигнат, рече Гасперини.

Гасперини истакна дека ќе го искористи целиот состав за претстојниот натпревар. 

-На секој натпревар играме на врвот од нашите можности, иако овој дојде во одреден момент. Сепак, ќе дадеме се од себе за да имаме максимални шанси за освојување на овој трофеј. Првата пречка е Интер. Планираме да го искористиме целиот состав: 11-те стартери и петте замени за да можеме да одиме напред, истакна Гасперини.

Аталанта во 2024 година одигра три финалиња: за Купот на Италија, за Лига Европа и за Суперкупот на Италија. 

-Ова е наша четврта завршница. Ваквите натпревари му даваат престиж на клубот, вредност на играчите и задоволство на сите нас. Овие дуели се гледаат многу ширум светот, а во нив сакате да оставите добар впечаток, да бидете конкурентни и да го покажете најдоброто од себе. За нас е важно да бидеме тука и уште поважно е да победиме, заклучи Гасперини. дс

Фото: Архива