Bruksel, 20 mars 2025 (MIA) - Konkurrueshmëria e BE-së, zhvillimet e fundit lidhur me Ukrainën dhe hapat e ardhshëm në përpjekjet për forcimin e mbrojtjes evropiane do të jenë temat kryesore të Samitit të rregullt të marsit të BE-së, i cili fillon sot në Bruksel.

Përveç kësaj, krerët e shteteve ose qeverive të vendeve anëtare të BE-së do të diskutojnë gjithashtu Kornizën e ardhshme Financiare Shumëvjeçare të bllokut për pas vitit 2027, zhvillimet më të fundit në Lindjen e Mesme dhe çështjet që lidhen me migracionin.

Në drekën e sotme të punës në Samit është ftuar edhe Sekretari i Përgjithshëm i KB-së, Antonio Guteresh, me të cilin liderët evropianë do të diskutojnë për multilateralizmin dhe çështje të tjera globale, si dhe përgatitjet për Konferencën e Tretë të KB-së për Oqeanet dhe Konferencën e Katërt Ndërkombëtar për Financimin e Zhvillimit.

Siç njoftoi korrespondenti i MIA-s nga Brukseli, në ftesën drejtuar liderëve të vendeve anëtare të BE-së për të marrë pjesë në Samit, kryetari i Këshillit Evropian Antonio Koshta tha se mbështetja e vazhdueshme për Ukrainën, nevoja për të investuar në mbrojtjen evropiane dhe konkurrueshmëria e bllokut janë çështje të lidhura ngushtë.

"Një Union më konkurrues do të thotë një Union më i fortë, i cili do të jetë më i aftë të mbrojë qytetarët e tij, interesat dhe vlerat e tij në skenën globale", theksoi Koshta.

Në njoftimin për Samitin theksohet se në një situatë ku përballet me sfida të shumta komplekse, BE-ja duhet të forcojë konkurrencën, autonominë strategjike dhe përshtatshmërinë e saj, në mënyrë që "Evropa të mbetet e begatë dhe të ruajë lidershipin e saj global".

“Në dritën e konkluzioneve të mëparshme, duke përfshirë ato të prillit 2024, Deklarata e Budapestit për një Marrëveshje të re të Konkurrueshmërisë dhe propozimet e fundit të Komisionit për Busullën e Konkurrueshmërisë, Marrëveshjen e Industrisë së Pastër dhe Paketën e Thjeshtimit, debati i liderëve mbi konkurrencën do të fokusohet në tre fusha prioritare: thjeshtësimi, energjia dhe Unioni  për kursime dhe investime, citohet në këtë paralajmërim.

Nuk mund të ketë negociata për Ukrainën pa pjesëmarrjen e Kievit, thuhet në tekstin e projekt-konkluzioneve të Këshillit të posaçëm të sotëm Evropian në Bruksel, kushtuar mbështetjes së Ukrainës.

Në këtë kontekst, Samiti është planifikuar të diskutojë inovacionin industrial, rinovimin, dekarbonizimin, trajnimin dhe mbajtjen e personelit të kualifikuar dhe mbështetjen për industrinë e automobilave, çelikut dhe metalit.

Lidhur me Ukrainën, Koshta në ftesë theksoi se garancia më e mirë e sigurisë që BE-ja mund t'i japë vendit është nëpërmjet forcimit të aftësive të tij vetëmbrojtëse, si dhe përmes ndërtimit të një "Evrope të Mbrojtjes" të besueshme dhe të fuqishme.

“Për të arritur paqen përmes forcës, Ukraina duhet të jetë në pozicionin më të fortë të mundshëm para, gjatë dhe pas negociatave për t'i dhënë fund luftës. Në këtë kuadër, liderët e BE-së do të bëjnë një bilanc të zhvillimeve të fundit”, citohet në njoftimin për Samitin.

Lidhur me përpjekjet për të nisur negociatat për arritjen e një paqeje gjithëpërfshirëse, të drejtë dhe të qëndrueshme, siç shtohet në paralajmërim, BE-ja mirëpret deklaratën e përbashkët të Ukrainës dhe Shteteve të Bashkuara të Amerikës, duke përfshirë propozimet për një marrëveshje armëpushimi, përpjekjet humanitare dhe vazhdimin e ndarjes së inteligjencës amerikane dhe asistencës për sigurinë.

“BE-ja është e gatshme të luajë rolin e saj të plotë në mbështetjen e hapave të ardhshëm, së bashku me Ukrainën, Shtetet e Bashkuara dhe partnerët e tjerë”, citohet në njoftim.

Në këtë kontekst, liderët do të vazhdojnë diskutimin e nisur në Këshillin e posaçëm Evropian më 3 mars, i cili diskutoi mbështetjen për Ukrainën dhe nevojën për të përshpejtuar përpjekjet për të forcuar gatishmërinë mbrojtëse të BE-së për të adresuar sfidat e menjëhershme dhe të ardhshme.

Në takimin e fundit të Këshillit Evropian, liderët kërkuan një thjeshtësim më të shpejtë të procedurave të nevojshme dhe mobilizimin e fondeve shtesë për mbrojtjen dhe industrinë e mbrojtjes, duke përmendur si fusha prioritare për veprim në nivel të BE-së dhe në bashkëpunim të plotë me NATO-n, sigurimin e mbrojtjes ajrore dhe raketore, sistemeve të artilerisë, raketave dhe municioneve, mjeteve ajrore pa pilot dhe inteligjencës artificiale ushtarake dhe luftimve kibernetike me dronë.

Liderët pritet të diskutojnë gjithashtu hapat e ardhshme pas prezantimit të djeshëm të Librit të Bardhë të Mbrojtjes Evropiane "Gatishmëria 2030" nga Komisioni Evropian dhe Planit të promovuar së fundmi "Riarmatimi i Evropës".

Udhëheqësit pritet gjithashtu të kenë shkëmbimin e parë të pikëpamjeve mbi Kornizën e ardhshme Financiare Shumëvjeçare të BE-së (MFF) dhe mbi mënyrat për të siguruar fonde për financimin e shpenzimeve të BE-së.

“Në këtë drejtim, liderët do të trajtojnë ekuacionin kryesor financiar për MFF-në e ardhshme dhe mënyrat për të siguruar që buxheti të ketë burimet e nevojshme për t'i mundësuar BE-së të arrijë objektivat e saj”, citohet në paralajmërim.

Në këtë pjesë të Samitit të Liderëve do t'u bashkohen edhe Krytearja e Bankës Qendrore Evropiane, Kristin Lagard dhe Kryetari i Eurogrupit, Paskal Donohju. Gjatë darkës së punës do të diskutohen edhe çështje që lidhen me MFF-në.

Liderët e BE-së do të trajtojnë situatën dhe zhvillimet e fundit në Lindjen e Mesme, veçanërisht në Gazë, lidhur me zbatimin e Marrëveshjes së Armëpushimit dhe lirimin e pengjeve, si dhe situatën në Siri.

“BE është thellësisht e shqetësuar nga përshkallëzimi dramatik ushtarak në Lindjen e Mesme dhe rreziku që paraqet për të gjithë rajonin. BE-ja është plotësisht e përkushtuar për të ndihmuar në de-përshkallëzimin e situatës dhe uljen e tensioneve, për të vazhduar ofrimin e ndihmës së bazuar në nevojat për njerëzit në rajon, veçanërisht më të cënuarit dhe për të rritur angazhimin e saj humanitar”, citohet në njoftim.

Në Samit është planifikuar gjithashtu të diskutohet për migracionin, i cili, siç u tha, mbetet një prioritet kyç për Këshillin Evropian, si dhe çështje specifike të politikës së jashtme.

"Unë do të përpiqem të përfundoj takimin tonë brenda një dite, por duke pasur parasysh pasigurinë rreth zhvillimeve të mundshme ndërkombëtare, nuk mund të përjashtoj mundësinë që mund të na duhet të vazhdojmë të premten," tha Koshta në ftesës drejtuar liderëve të vendeve anëtare të BE-së për të marrë pjesë në Këshillin e rregullt Evropian të marsit javën e ardhshme.

Foto: MIA arkiv