Сам Салвадор, 21 април 2026 (МИА) – Во ЕЛ Салбадор почна масовното судење на речиси 500 наводни членови на озлогласената банда МС-13 (MS-13), пренесе ДПА.

Канцеларијата на јавниот обвинител соопшти дека „486 водачи на бандата МС-13 се соочуваат со правдата на отворено рочиште“.

„Овие криминалци се обвинети за извршување на повеќе од 47.000 кривични дела, кои директно ги наредиле и кои биле спроведени низ целата земја меѓу 2012 и 2022 година“, соопштија салвадорските обвинители.

Обвиненијата вклучуваат убиства и фемицид, изнуда, трговија со дрога, киднапирање и трговија со оружје.

„Тие се процесуираат и за бунт бидејќи се обиделе да задржат територијална контрола со цел да воспостават паралелна држава, пркосејќи му на државниот авторитет и поткопувајќи го националниот суверенитет и уставниот поредок“, соопшти Канцеларијата на јавниот обвинител.

Обвинителите рекоа дека меѓу обвинетите има и поединци кои стојат зад смртоносниот бран на насилство во 2022 година, кој резултираше со 86 смртни случаи и предизвика вонредна состојба, која сè уште е во сила и ги суспендира уставните гаранции.

Масовното судење е можно благодарение на законот од 2025 година, имплементиран во контекст на вонредната состојба, кој им овозможува на властите „масовно да ја процесуираат целата криминална структура во едно единствено предметно досие“.

МС-13, или Мара Салватруча (Mara Salvatrucha), е една од двете банди обвинети за голем дел од насилниот криминал во Ел Салвадор. Таа е активна и во САД, каде што беше основана од салвадорски мигранти во 1980-тите. јт/ссм/

Фото: ЕПА архива