Скопје, 29 септември 2023 (МИА) - На подрачјата на Секторите за внатрешни работи Битола, Велес, Охрид, Тетово, Штип и Куманово  во текот на вчерашниот ден биле реализирани низа превентивни активности што во најголем дел биле посветени на сообраќајната безбедност на децата, но и генерално за нивната безбедност во самите училишта, особено во контекст на појавите на врсничко насилство и слично.

На подрачјето на СВР Битола, во Битола во три основни училишта биле реализирани едукативни работилници од областа на сообраќајните правила и прописи за децата како учесници во сообраќајот – пешаци или како корисници на велосипеди и тротинети.

Од МВР денеска соопштија дека сообраќајот бил тема на активностите и во Македонски Брод и во Крушево, но пред се наменети за возачите на моторни возила, а напоредно со тоа во Крушево била реализирана и превентивната активности за заштита од пожари на отворен простор на локации во близина на излетничко рекреативни места во околината на Крушево.

И на подрачјето на СВР Куманово, односно во Крива Паланка во ООУ „Јоаким Крчовски“, вчера била заокружена повеќедневната сообраќајна едукација на учениците од сите одделенија насловена како „Сообраќаен буквар“, додека пак на подрачјето на СВР Велес, односно во ООУ „Димка Ангелов Габерот“ во село Ваташа, кавадаречко, сообраќајна едукација беше реализирана за првооделенците. Дополнително, во ова училиште а за учениците од повисоките одделенија беше реализирана наменски подготвена работилница на темите од врсничкото насилство.

Вчера од СВР Тетово била иницирана средба со директорите на шесте тетовски средни училишта на која што присуствуваа и претставници на локалната власт и на училишните совети на родители, со примарна цел воспоставување поквалитетна соработка во насока на максимална безбедност во училиштата и надвор од нив.

На подрачјето на СВР Охрид пак, биле реализирани неколку тематски различни превентивни активности во Охрид, Кичево и Струга. Во Охрид Отсекот за превенција реализирал активности од областа на сообраќајната безбедност и заштитата на граѓаните од имотни деликти, а во просториите на ПС од ОН Струга се одржала средба со претставници на месни заедници од струшко во врска со мерките и активностите за заштита од пожари на отворен простор, особено при изведување на земјоделски работи. Во Кичево превентивната активност, исто така, била посветена на заштитата од имотни деликти.

На подрачјето на СВР Штип, односно во Берово, полициски службеници од ОВР Берово на повеќе сообраќајници во градот спроведоа превентивна активност за задолжителното носење на сигурносни појаси, како за возачите така и за сопатниците во возилата. цр/дма/

Фото:МВР