Велес,18 јули 2025 (МИА) - Општина Велес со договорот потпишан со Владата  доби  средства во висина од над 6 милиони евра за реализација на 15 капитални проекти. Како што информира денеска за МИА, градоночалникот Марко Колев, Владата им доделува финансиски  средства за реконструкција на неколку локални патишта, меѓу кои: патот од Отовица до Сојаклари, како и патот од село Чолошево до населбата  Дорутовец. Исто така, ќе се реконструираат влезовите во селата Иванковци, Башино Село на потегот од фирмата  „Енмон“ до сред село. Реконструкција на влез во село од село Караслари од бензинската пумпа на  „Макпетрол“ до центарот на селото и реконструкција на влез во село Мамутчево. 

Во рамки на проектите предвидена е и реконструкција на плоштадот во центарот на Велес, како и на Противпожарниот дом, кој ќе добие и нов помошен објект и комплетно  партерно уредување. Спортската сала „Гемиџии“ ќе биде реконструирана со интервенции на електричната и водоводната инсталација, како и делови од архитектурата.

Дополнително, ќе се реконструира улицата „Васил Главинов“, каде е предвидена и изградба на потпорен ѕид, фасадата на средното училиште ССОУ „Димитрија Чуповски“, улицата „Васил Ѓоргов“ од крстосницата кај театарот до плоштад Којник, како и улиците „11 Октомври“, „Белградска“ делницата од градинката до магацините на ЈКП Дервен и „Алексо Демниевски Бауман“ од поранешниот „Жито Вардар“ до Железничката станица.

Во изјавата за МИА, градоначалникот Марко  Колев истакна дека оваа е најголема финансиска поддршка од Владата, што досега ја добива Општина Велес. Тој најави дека нивната реализација треба да започне до крајот на годинава. 

Како што потенцира Колев, проектите претставуваат значаен чекор во насока на подобрување на локалната инфраструктура и урбано уредување, а нивната имплементација е резултат на успешната соработка помеѓу локалната и централната власт.

-Соработката помеѓу локалната и централната власт е клучна за развој на општината, за што и во иднина ќе продолжиме да се залагаме, потенцира градоначалникот Колев.ад/лв/

фото: МИА архива