Париз, 23 септември 2024 (МИА) - Новиот француски министер за внатрешни работи Бруно Ретаљо денеска изјави дека безбедноста ќе биде негов главен приоритет при вршењето на функцијата.

Изјавата ја даде при преземањето на функцијата заедно со другите министри во владата на премиерот Мишел Барние.

Иако сојузот на левичарските партии победи на изборите и екстремно десничарскиот Национален собир (РН) беше единствената партија со најмногу гласови, центристите на Макрон на крајот се согласија со конзервативците и десниот центар да формираат влада.

- Францускиот народ сака повеќе ред, ред на улиците, ред на границите, рече Ретаљо (63), долгогодишен сенатор на конзервативната Републиканска партија (ЛР). Тој рече дека ќе биде строг кон оние кои ги напаѓаат или не ги почитуваат политичарите и дека ќе заземе цврст став за антисемитизмот.

Ретаљо, кој долго време повикува на построги имиграциски политики кои ќе вклучуваат кратења на социјалната помош, не прецизираше како ќе му пристапи на ова прашање.

Министрите, вклучително и новите министри за финансии и буџет, се главно непознати за пошироката јавност и имаат мало политичко влијание.

Барние, кој се сретна со сите нив за првпат денеска, ги повика да бидат скромни, да соработуваат и да избегнуваат јавни настапи, соопшти неговиот кабинет.

Покажете почит кон сите наши сограѓани и политички партии, слушајте ги сите, ја цитира канцеларијата неговата изјава. ссм/

фото: ЕПА