Лондон, 10 јуни 2025 (МИА) – Велика Британија и сојузниците ќе воведат санкции против двајца израелски ултрадесничарски министри поради нивниот однос кон војната во Појасот Газа, објави денеска лондонскиот дневен весник „Тајмс“.

Велика Британија ќе им се придружи на Канада, Австралија, Нов Зеланд и други земји во замрзнување на банкарските сметки и ќе воведат забрана за патување за министерот за внатрешна безбедност Итамар Бен-Гвир и за министерот за финансии Безалел Смотрих.

Велика Британија, како и дел од европските држави, се обидува да го засили притисокот врз израелскиот премиер Бенјамин Нетанјаху да дозволи дистрибуција на хуманитарна помош во Појасот Газа.

Велика Британија минатиот месец ги суспендираше разговорите за слободна трговија со Израел поради неговата „скандалозна политика“ во Западниот Брег и во Појасот Газа, го отповика својот амбасадор и најави нови санкции против доселениците на Западен Брег.

Шефот на британската дипломатија Дејвид Лами последната израелска офанзива во Појасот Газа ја оцени како „ново темно поглавје во конфликтот“. Тој ги осуди и коментарите на Смотрич за можно уништување на палестинската енклава и преместување на жителите во трети земји. ми/

фото: МИА архива