Вашингтон, 2 јуни 2023 (МИА) - Сенатот на американскиот Конгрес усвои закон поддржан од американскиот претседател Џозеф Бајден, со кој се зголемува горната граница на државниот долг од 31,4 трилиони долари, со што се елиминира неисполнувањето на финансиските обврски на владата.

Сенатот синоќа гласаше со 63 гласа „за“ и 36 „против“, а Претставничкиот дом го усвои законот во средата.

Министерството за финансии предупреди дека нема да може да ги исполни сите свои обврски од 5 јуни доколку Конгресот не дејствува дотогаш. Бајден ја пофали навремената акција на Конгресот.

„Овој договор меѓу демократите и републиканците е голема победа за нашата економија и американскиот народ“, наведе Бајден во соопштение и најави дека ќе го потпише законот што е можно поскоро. зш/