• A-
  • A
  • A+
четврток, 19 април 2018, 

Побарана конгресна истрага против Трамп за „недолично секусално однесување“

Побарана конгресна истрага против Трамп за „недолично секусално однесување“

Вашингтон, 12 декември 2017 (МИА) - Три од жените, кои лани го обвинија американскиот претседател Доналд Трамп за „недолично секусално однесување“, синоќа ги повторија своите обвинувања и побараа од Конгресот на САД да отпоче официјална истрага за нивните наводи, јави „Гласот на Америка“.

- Ако Конгресот сметаше дека треба да го истражи случајот на сенаторот Ал Франкен, мислам дека е праведно конгресмените да го имаат истиот пристап и кон Трамп, изјави една од трите жени Рејчел Крокс на прес-конференција.

Сенаторот Франкен поднесе оставка минатата недела по обвиненијата што против него ги изнесоа неколку жени за сексуално вознемирување.

Крокс лани го обвини Трамп дека на сила ја бакнал во 2005 година, кога работела на рецепцијата во „Трамп тауер“ во Њујорк.

Таа на прес-конференцијата беше придржувана од Саманта Холвеј, која тврди дека Трамп без покана упаднал во нејзината гардероба за време на изборот за Мис на САД во 2012 година, како и од Џесика Лидс, кој го обвини американскиот претседател дека непримерно ја допирал и бакнувал додека седела до него во авион кон крајот на 70-те години на минатиот век.

Крокс, Холвеј и Лидс, заедно со уште десетина други жени, лани во текот на кампањата за претседателските избори, го обвинија Трамп за сексуално вознемирување.

Трамп досега во повеќе наврати ги отфрли ваквите обвинувања, а Белата куќа синоќа оцени дека „прашањето е затворено“ со неговата изборна победа.

- За овие лажни тврдења, кои во повеќето случаи беа оспорени со изјави на очевидци, долго се расправаше во текот на ланската кампања и американскиот народ го изнесе својот став обезбедувајќи му решавачка победа, соопшти Белата куќа, додавајќи дека станува збор за „политички мотивирани обвинувања“.

Обновените обвинувања против Трамп доаѓаат во време кога повеќемина политичари, уметници, новинари и бизнисмени беа обвинети за сексуално малтретирање. сп/00:21

###

Сите права се задржани. Овој материјал не смее да се складира, издава, емитува, препишува и повторно да се дистрибуира во каква било форма, без писмена дозвола од Македонската информативна агенција.