• A-
  • A
  • A+
четврток, 19 април 2018, 

Путин-Ердоган: Одлуката на САД за Ерусалим го дестабилизира Блискиот Исток (ДПЛ)

Путин-Ердоган: Одлуката на САД за Ерусалим го дестабилизира Блискиот Исток (ДПЛ)

Анкара, 11 декември 2017 (МИА) - Русија и Турција сметаат дека одлуката на САД да го признаат Ерусалим за главен град на Израел го дестабилизира Блискиот Исток, изјави рускиот претседател Владимир Путин по денешната средба во Анкара со шефот на турската држава Реџеп Тајип Ердоган.

На заедничката прес-конференција по средбата на двајцата претседатели, што траеше еден час, Путин предупреди дека одлуката на американската Администрација нема да помогне за решавање на ситуацијата на Блискиот Исток, туку токму спротивното - ќе ја дестабилизира и без тоа сложената состојба во регионот.

Според Путин, статусот на Ерусалим треба да биде договорен во директни преговори меѓу Израел и Палестинците.

Ердоган и Путин

Ердоган, од своја страна, изјави дека на средбата со Путин станало збор и за начините за решавање на конфликтот во Сирија и дека се договориле одново да се сретнат во Сочи што е можно поскоро за да разговараат на оваа тема.

Во врска со Сирија, Путин истакна дека двете земји тесно соработувата околу ситуацијата во оваа блискоисточна земја. 

Путин се заложи за интензивирање на билатералната економска соработка и ја изрази својата решеност за зголемување обемот на трговската размена меѓу Русија и Турција.

Турскиот претседател, пак, најави дека договорот за купувањето на системот за проввоиздушна одбрана С-400 за потребите на турската Армија од Русија ќе биде финализиран во текот на оваа недела.

Ердоган и Путин

Како што јави МИА, ова е трета средба меѓу Путин и Ердоган за неполни три месеци. Путин ја посети Анкара на 28 септември, по што двајцата лидери потоа се сретнаа на 22 ноември во рускиот град Сочи.

Односите меѓу Анкара и Москва се влошија во ноември 2015 година, откако турската противвоздушна одбрана собори руски воен авион во реонот на границата меѓу Турција и Сирија. Но, по ланскиот неуспешен обид за воен удар во Турција, дојде до подобрување на билатералните односи, што резултираше и со неколку средби меѓу Ердоган и Путин и склучување на повеќе договори за соработка, вклучително и за изградба на гасоводот “Турски поток“. мн/сп/21:36

###

Сите права се задржани. Овој материјал не смее да се складира, издава, емитува, препишува и повторно да се дистрибуира во каква било форма, без писмена дозвола од Македонската информативна агенција.