МИА Радио флешПакети

МИА Радиофлеш

13 декември 2019

13 декември 2019

– Многу често работодавачите исплаќаат незначителни износи на име регрес за годишен одмор, за што говорат и документираните случаи на Хелсиншкиот комитет, во кои работодавачите неретко исплаќаат 1000, 500, па дури и 100 денари регрес за годишен одмор. Околу седум отсто од сите случаи на повреди на работнички права пријавени до Хелсиншкиот комитет за човекови права се однесуваат токму на случаите поврзани со исплаќањето на регресот за годишен одмор.

– Неспорно е дека постојано вршиме прилагодување на домашното право со правото на ЕУ што е наша стратешка цел. Но, она што е моја лична дилема, а верувам и на најголемиот дел од нашите граѓани е дали државните институции суштински или само формално ги имаат усвоено и ги следат европските вредности и принципи во оваа област, рече претседателот Стево Пендаровски во обраќањето на денешниот Регионален форум за борба против корупција на тема „Исполнување на ветувањето за проширување на ЕУ: 30 години добро управување и антикорупциски реформи во Централна и Источна Европа“.

– Министерството за труд и социјална политика соопшти дека согласно Законот за празниците, 21 декември (сабота), односно Денот на настава на турски јазик е неработен ден за граѓаните припадници на турската заедница во Република Северна Македонија.

– Владите на Северна Македонија и на Србија го усвоија текстот на Договорот за отворање на заеднички граничен премин Лојане – Миратовац, објави на својот Фејсбук профил вицепремиерот задолжен за европски прашања Бујар Османи.

– Во текот на изминатата недела (од 2 декември до 8 декември), пријавени се 73 заболени од грип, што е намалување за 33 отсто споредено со неделата пред неа кога беа регистрирани 109 заболени од грип, се наведува во извештајот што на својата веб страница го објави Институтот за јавно здравје (ИЈЗ).

– Суд во Солун прогласи за невин и ослободи 38-годишен државјанин на Северна Македонија, уапсен во јануари годинава под сомнение дека тргувал со дрога, поради што му беше одредена и мерка притвор, јави дописничката на МИА од Атина.

– Во рамки на грчкото претседателство со Организацијата за црноморска економска соработка, од утрово во Атина започна 41. Состанок на Советот на министрите за надворешни работи на земјите членки.

– Најмалку 25 лица се повредени во денешната експлозија во зграда во германскиот град Бланкенбург, јавија германските медиуми.

– Новиот европски комесар за единствен пазар Тијери Бретон изјави денеска дека Брисел сака „обнова“ на односите со Лондон, посебно во трговијата, по победата на конзервативците на Борис Џонсон на вонредните парламентарни избори, што ќе значи Брегзит до крајот на јануари.

– Велика Британија ќе ја напушти Европската унија до 31 јануари, истакна денеска британскиот премиер Борис Џонсон по убедливата победа на изборите.

– Усвојувањето резолуција од американскиот Сенат, со која се признава ерменскиот геноцид, претставува „победа за правдата и за вистината“, напиша на Твитер ерменскиот премиер Никол Пашињан.

– Членови на војската на Нов Зеланд, опремени со заштитни маски и специјални одела, извлекоа шест тела од вулканскиот Бел остров каде претходно неделава се случи ерупција, а лекарите и натаму се борат за животите на тешко повредените лица, кои се здобија со изгореници.

Back to top button
Close
Close