Shkup, 24 shtator 2024 (MIA) - Laima Lucia Andrikiene, anëtare e Gjykatës Evropiane të Revizorëve, ka vizituar sot Kuvendin e Republikës së Maqedonisë së Veriut, ku realizoi takim të përbashkët me Kryetarin Afrim Gashi, me nënkryetarin e Kuvendit dhe kryetarin e Komisionit për Çështje Evropiane, Antonijo Milloshoski, dhe me kryetaren e Komisionit për Financim dhe Buxhet, Sanja Llukarevska.

Në takim, siç njoftoi pres-shërbimi qeveritar morën pjesë edhe ambasadori evropian Mihalis Rokas, si dhe Tomas Makevicius dhe Pjetro Puriçella nga Gjykata Evropiane e Revizorëve.

Në fokus të diskutimit ishte Plani i Rritjes për Ballkanin Perëndimor dhe përfitimet e pritshme nga zbatimi i tij në procesin e integrimit europian të rajonit dhe konkretisht të vendit tonë. 

Në këtë kontekst, u shkëmbyen mendime për agjendat reformuese të vendeve të rajonit, miratimi i të cilave në institucionet e BE-së është parakusht për realizimin e ndihmës financiare.

Theks i veçantë iu kushtua kritereve në pjesën e sundimit të së drejtës, si dhe mundësive për rritje ekonomike dhe për ngritjen e kapaciteteve të institucioneve dhe administratës në vendet e rajonit, si aspirante për anëtarësimin e plotë në BE.

Gashi theksoi se për qytetarët e Maqedonisë së Veriut, si dhe për gjithë rajonin, është me rëndësi të madhe të ndjehet ndihma konkrete nga BE-ja në kuptimin financiar, si nxitje për përkushtimin e mëtutjeshëm për zbatimin e reformave.  

Milloshoski vuri në dukje se Plani i Rritjes për Ballkanin Perëndimor sjell përfitime për të dyja palët, përkatësisht për vendet e rajonit dhe për Bashkimin Evropian, si një lloj entuziazmi i mëtutjeshëm për integrimin evropian.

Deputetja Llukarevska tha se në Kuvendin e RMV-së, pavarësisht prejardhjes politike të deputetëve, në përgjithësi nuk ka dallime në lidhje me anëtarësimin e vendit në BE, andaj Plani i Rritjes për Ballkanin Perëndimor është me rëndësi të veçantë për forcimin e mëtejmë të atij konsensusi. mb/

Foto: Kuvendi i RMV-së