Нови дојави за бомби во училиштата во Белград пред изборите, Владата со протокол за справување со овие закани
- Неколку основни училишта во Белград денеска добија дојави за подметнати бомби, а Владата, поради ваквите секојдневни закани, со ресорните министерства изработува протокол за справување со заканите за училиштата, јави дописникот на МИА од Белград.
![Нови дојави за бомби во училиштата во Белград пред изборите, Владата со протокол за справување со овие закани](https://mia.mk/index.php/images/20231212152855_big_730x400_73.webp )
Белград, 12 декември 2023 (МИА) - Неколку основни училишта во Белград денеска добија дојави за подметнати бомби, а Владата, поради ваквите секојдневни закани, со ресорните министерства изработува протокол за справување со заканите за училиштата, јави дописникот на МИА од Белград.
Училиштата во Белград веќе година и пол добиваат дојави за бомби, а тоа кулминираше во последните неколку дена, кога во повеќето училишта секојдневно пристигнуваат дојави кои досега, за среќа, сите беа лажни. По известувањето, училиштето се евакуира, а децата чекаат или во училишниот двор или во близина на училиштето да се заврши проверката и потоа да се вратат на настава. Многу родители се дополнително загрижени затоа што инспекциите на училиштата се релативно кратки и се прашуваат дали се доволно темелни. Се поставува и прашањето што ќе се случи доколку пристигнат извештаи на денот на гласањето на 17 декември во училиштата кои се изборни места и дали нивната неодамнешна зачестеност, како што некои сметаат, има за цел да ја подигне тензијата пред изборите.
Членовите на изборните комисии од опозицијата велат дека дека нема да дозволат ваквите случаи да доведат до траен прекин на гласањето и ќе инсистираат гласањето да продолжи, откако полицијата ќе го заврши својот дел од работата.
Министерката за образование Славица Ѓукиќ Дејановиќ изјави дека поради дојавите за поставени бомби во белградските училишта, ресорното министерство и Министерството за внатрешни работи веќе два дена работат на усогласување на протоколот за однесување на училиштата и дека предлогот е да се изврши детален увид во училиштата и сите области околу нив пред почетокот и по завршувањето на часовите.
Таа изјави дека премиерката Ана Брнабиќ и нејзиниот кабинет имале состаноци со претставници на две министерства (МВР и Министерството за образование) и дека веќе два дена работат на усогласување на протоколот за деталите што ќе им бидат достапни на директорите на училиштата и на другите тимови.
- Еден од нашите предлози, кој дефинитивно ќе биде вклучен во нашиот протокол, е детално да се прегледаат училиштата и сите области околу училиштата и по завршувањето на наставата и пред почетокот на наставата. До утре ќе ги имаме деталите за овој протокол, рече Ѓукиќ Дејановиќ.
Таа додаде дека Министерството за образование од почетокот на лажните дојави за бомбите дава инструкции на директорите на училиштата кои формираат одредени тимови.
- Лажните дојави за поставени бомби имаат тенденција да предизвикуваат општа конфузија, колективен страв. Децата, наставниците, воспитувачите и родителите постојано да размислуваат за безбедноста, додаде Ѓукиќ Дејановиќ. паг/
Фото: МИА архива