Скопје, 12 октомври 2025 (МИА) - Во текот на 15 месеци од моето раководење како вршител на должноста градоначалник на Општина Гостивар, реализиравме 29 проекти, а за околу 50 други проекти ги обезбедивме потребните средства, изјави кандидатот за градоначалник на општина Гостивар, Валбон Лимани, од коалицијата НАИ на прес-конференција во седиштето на ДУИ во Скопје. 

Но сега е време за ново поглавје – за долгорочно планирање и одржлив развој на нашиот Гостивар. Изработивме современ урбанистички и просторен план кој ќе го трансформира нашиот град во жива, функционална и модерна средина, рече Лимани, наведува ДУИ во соопштение кое МИА го пренесува интегрално. 

Мостот на хармонијата – симбол на поврзување и развој

Во текот на нашиот мандат, Гостивар ќе добие нов мост над реката Вардар – „Мостот на хармонијата“. Тоа ќе биде современо инфраструктурно дело со четири сообраќајни ленти, патеки за велосипеди и безбедни тротоари за пешаци. Мостот ќе ги поврзува населбите, ќе го олесни сообраќајот и ќе придонесе за економски развој на градот.

Трансформација на главниот булевар

Отворањето и трансформацијата на главниот булевар е уште еден голем проект. Тој ќе стане урбаното срце на Гостивар – модерна артерија со современо осветлување, патеки за пешаци и велосипеди, како и зелени површини кои ќе донесат живот и енергија во градот. Тоа ќе биде место за средби на младите, семејствата, уметниците – на сите граѓани.

Подземен паркинг кај Општината

За конечно решавање на проблемот со паркирањето во центарот, ќе изградиме модерен подземен паркинг на две нивоа со површина од 1.900 м² и капацитет од 126 возила. Тоа ќе биде систем со електронска контрола и висок степен на безбедност.

Преродба на центарот на градот

Центарот на Гостивар ќе се прероди како современ јавен простор со подвозник за возила и пешаци, детски игралишта, зони за јавни активности и богато зеленило. На новиот плоштад ќе се создадат 219 паркинг-места, кои заедно со подземниот паркинг кај Општината ќе обезбедат 345 нови паркинг-места.
Вкупната површина на плоштадот ќе изнесува 6.810 м², од кои 1.362 м² се зелени површини, а над 110 м² се предвидени за детски игралишта.

Политика за локален економски развој

За поттикнување на локалната економија и создавање нови можности за вработување, ќе спроведеме нова поддржувачка политика за бизнисите и иновациите: Општинските даноци за нови компании ќе се намалат од 6.000 денари на само 1.000 денари во првите пет години од нивното работење.

Младите – нашата иднина

За секој млад човек до 30 години ќе обезбедиме поддршка за нивните стартапи во износ од 60.000 денари. Секоја година ќе поддржиме 30 нови младински иницијативи.

Жените – столб на развојот

Секоја година, 30 девојки и жени кои ќе аплицираат за поддршка ќе добијат 60.000 денари за развој на нивните бизнис иницијативи.

Благодарност до нашите баби и дедовци!

Овој проект е наменет за сите пензионери кои се грижат за своите внуци додека нивните деца се на работа. Тие ќе добиваат симболична годишна помош од 30.000 денари од Општина Гостивар.

Безбедни училишта без насилство

Ќе формираме „Амбасадори на безбедноста и почитта“ во секое училиште. Овие ученици ќе бидат избрани со помош на наставниците и училишниот психолог – не само според успехот, туку и според влијанието кое го имаат врз своите соученици.

Целта е јасна: Учениците повеќе влијаат еден на друг отколку возрасните; Жртвите се чувствуваат побезбедно кога имаат врсници кои ги поддржуваат; Училиштето станува посилен и пообединет колектив. Инвестицијата во образованието на нашите деца е најголемата инвестиција што можеме да ја направиме.

Драги граѓани,
Овие проекти не се само цртежи на хартија – тие се продолжение на работата со посветеност и чесност. Тие се доказ дека Гостивар има потенцијал, но пред сè, има луѓе кои го сакаат со срце.

Демократска унија за интеграција 

Фото: МИА архива