Дубровник, 14 октомври 2025 (МИА) - Македонија е подготвена да работи со сите партнери за да ги претвори регионалните заложби од Зелената агенда во мерливи резултати - за здравјето на своите граѓани, благосостојбата на идните генерации и заштитата на животната средина, рече денеска заменик-министерката за животна средина и просторно планирање Ане Лашкоска на Втората министерска конференција што се одржува во Дубровник.

Како што посочи Лашкоска во обраќањето на еден од панелите, Зелената агенда за Западен Балкан е темел за зелената транзиција и се стреми кон операционализирање на заедничките цели на овој регион.

-Македонија ја реафирмира својата целосна политичка посветеност за имплементација на Зелената агенда за Западен Балкан, како темел на нашиот пат кон одржлив развој, европска интеграција и климатска отпорност. Свесни сме дека заштитата на животната средина, зелената транзиција и одржливото управување со ресурсите не се предизвици со кои се соочуваме самостојно, туку се заеднички одговорности што бараат солидарност, координација и колективна акција низ целиот регион, потенцира заменик-министерката.

Според неа, регионот се соочува со бројни заеднички еколошки предизвици — загадување на воздухот и водата, управување со отпадот, адаптација кон климатските промени, загуба на биодиверзитетот.

-Ниту еден од овие проблеми не ги признава државните граници. Во тој контекст, регионалната соработка не е само пожелна, туку и неопходна. Денес сме тука не само како претставници на нашите влади, туку и како партнери во заедничка визија — за почиста, поздравa и поотпорна Европа и Западен Балкан, подвлече Лашкоска.

Информира и дека Македонија презема значајни чекори за усогласување на националните политики со петте столба на Зелената агенда.

-Процесот на скрининг за Поглавјето 27 е завршен со позитивна оценка за институционалната подготвеност, напомена Лашкоска, осврнувајќи се детално на преземените активности и резултатите во однос на декарбонизацијата, биодиверзитетот, циркуларната економија и намалувањето на загадувањето.

Таа го поздрави и усвојувањето на Декларацијата од Дубровник што денеска во рамки на состанокот треба да се официјализира. Лашкоска ја квалификува Декларацијата како заедничка политичка платформа што ја зајакнува регионалната соработка, го забрзува усогласувањето со Европскиот зелен договор и ја поддржува трансформацијата на економиите од регионот согласно стандардите на ЕУ.

Зад Декларацијата стојат Македонија, Србија, Црна Гора, БиХ, Косово и Албанија. мч/вј/

Фото: МИА