Исламабад, 26 август 2024 (МИА) – Вооружени напаѓачи застрелале 23 патници откако ги идентификувале и ги извадиле од автобуси, возила и камиони во еден од најсмртоносните напади во југозападен Пакистан, соопштија полицијата и властите.

Убиствата се случиле во текот на ноќта во Кусахаил, област во провинцијата Белуџистан, изјави високиот полициски претставник Ајуб Ачакзаи. Напаѓачите запалиле најмалку 10 возила пред да побегнат од местото на настанот.

Пакистанскиот министер за внатрешни работи Мохсин Накви нападот го нарече „варварски“ и вети дека оние што стојат зад него нема да ја избегнат правдата.

Сè уште не се покренати конкретни обвиненија, но сепаратистите во Белуџистан често убиваат работници и други луѓе од источниот дел на земјата – Пенџаб, како дел од кампањата која е со цел да ги принудат да ја напуштат провинцијата.

За повеќето претходни убиства беа обвинети припадници на Ослободителна војска на Белуџистан и други групи кои бараат независност од централната влада во Исламабад. Во провинцијата има и исламистички борци. јт/

Фото: ЕПА