Uashington, 14 prill 2026 (MIA) - ShBA-ja nuk do të kthehet në Pakistan për bisedime të ardhshme paqeje me Iranin, deklaroi presidenti Donald Tramp sot për "Njujork post". Deklarata vjen ndërsa bisedimet vazhdojnë në heshtje pasi një delegacion amerikan fundjavën e kaluar përfundoi bisedimet maratonë në Islamabad pa një marrëveshje.

 "Dëgjoni, gjërat po ecin përpara, por, e dini, mjaft ngadalë", tha Trampi në një telefonatë. "Gjërat po përmirësohen, por nuk mendoj se takimi ynë do të mbahet atje. Ndoshta do të zgjedhim një vend tjetër, tashmë e kemi një në mendje".

 Kur e pyetën nëse Turqia po shqyrtohet si një vendndodhje e mundshme, duke pasur parasysh marrëdhëniet e saj si me ShBA-në edhe me Iranin, Trampi u përgjigj: "Jo, por diçka më qendrore. Ndoshta Evropën".

Duke u përqendruar në liderët evropianë, presidenti tha se ata nuk kanë bërë asgjë për të ndihmuar në rihapjen e Ngushticës së Hormuzit. 

 "Ata nuk po bëjnë asgjë, ata thjesht po mbajnë takime. E vetmja gjë që po bëjnë është të takohen", tha ai. "Ata do të donin ta zgjidhnin atë, por thjesht nuk dinë si. Ata janë tigra letre".

 Megjithatë, pak pas bisedës me një gazetar të gazetës "Post", presidenti Tramp telefonoi përsëri dhe njoftoi një kthesë të mundshme.

 "Në fakt, prisni, sepse diçka mund të ndodhë në dy ditët e ardhshme. Jemi sigurisht gjithnjë e më të prirur të shkojmë atje", tha ai, duke u përqendruar të Pakistani.

 Foto: EPA