Shkup, 12 dhjetor 2025 (MIA) - Perspektiva gjinore duhet të integrohet plotësisht në procesin e integrimit evropian të Maqedonisë së Veriut, theksoi zëvendësministrja për Çështje evropiane, Viktorija Trajkov në konferencën "Barazia gjinore në fokusin e anëtarësimit në BE - udhërrëfyes për Maqedoninë e Veriut".

Ajo theksoi se kjo nuk është vetëm një detyrim evropian, por nevojë thelbësore për krijimin e një shoqërie të drejtë dhe inkluzive.

"Me Konferencën e sotme duam të theksojmë qëllimin kryesor - të forcojmë përpjekjet tona të përbashkëta për të integruar plotësisht perspektivën gjinore në procesin eurointegrues", theksoi Trajkov në fjalën hyrëse.

Ajo potencoi se Qeveria mbetet e përkushtuar fortë në avancimin e barazisë gjinore në të gjitha sferat e shoqërisë konform standardeve evropiane.

Sipas saj, barazia gjinore nuk është vetëm një vlerë demokratike, por parakusht për zhvillimin ekonomik, komunitete të forta dhe një shoqëri pa stereotipa.

"Barazia gjinore është çelësi i proceseve demokratike. Ajo përshpejton zhvillimin ekonomik, krijon komunitete më gjithëpërfshirëse dhe kohezive, ndërton një shoqëri në të cilën thyhen stereotipat, ndërsa të rinjtë stimulohen të besojnë dhe krijojnë një mjedis respektiv të ndërsjellë, bashkëpunim dhe mirëkuptim - një shoqëri mundësish. Pa fuqizimin ekonomik dhe social të grave, nuk mund të arrihet qëndrueshmëria dhe mirëqenia e vërtetë", ka thënë ajo.

Në fjalimin e saj, ajo iu referua edhe progresit që bën vendi, përfshirë zgjedhjen e presidentes së parë femër e cila, siç tha ajo “thyen tabutë se pozicionet e larta shtetërore janë të paarritshme për gratë”.

"Zëri i grave po dëgjohet gjithnjë e më shumë, ndërsa potenciali i tyre i madh duhet të njihet dhe pranohet. Ne e dimë detyrën tonë të shtëpisë - të punojmë me vendosmëri dhe këmbëngulje për progresin në sferën e barazisë gjinore në rrugën drejt integrimit evropian, jo vetëm si detyrim, por mbi të gjitha si një shprehje e vendosmërisë sonë për të krijuar një shoqëri që do të ofrojë të drejta dhe mundësi të barabarta për të gjithë”, shtoi ajo.

Konferenca që sot zhvillohet në Shkup i kushtohet rolit të barazisë gjinore si një element kyç në procesin e paraqasjes së Maqedonisë së Veriut në Bashkimin Evropian. Ngjarja bashkoi institucionet, ekspertët, organizatat ndërkombëtare dhe sektorin e shoqërisë civile me qëllim që të shqyrtojnë sfidat, detyrimet dhe mundësitë për integrimin e perspektivës gjinore në të gjitha fazat e integrimit evropian.

Foto: MIA