Tiranë, 22 janar 2026 (MIA) - Parlamenti i Shqipërisë pasditen e sotme, me 110 vota "pro", një abstenim dhe asnjë votë "kundër", ratifikoi marrëveshjen e pranimit të Republikës së Shqipërisë, të përfaqësuar nga kryeministri Edi Rama, në Bordin e Paqes, të iniciuar nga presidenti i SHBA-së Donald Tramp.

Në debatin e nxehtë, ndër të tjera, amendamenti i propozuar nga deputetët e opozitës për të fshirë emrin e Ramës u rrëzua me 79 vota kundër, 30 pro dhe asnjë abstenim.

Opozita kërkoi që vendi të përfaqësohej në Bordin e Paqes nga kreu i shtetit, Bajram Begaj.

Ndërkohë, presidenti Bajram Begaj autorizoi kryeministrin Rama të nënshkruante marrëveshjen e Bordit të Paqes.

"E çuam Shqipërinë, të përkushtuar ndaj paqes, në samitin e OSBE-së dhe në tryezën e Këshillit të Sigurimit të Kombeve të Bashkuara, ku ngritëm flamurin dhe kombin shqiptar me krenari dhe nder", tha ndër të tjera Rama.

Ai iu përgjigj edhe pyetjes se pse nuk ishte në Davos. Sipas tij, nuk shkoi në Forumin e Davosit sepse kishte një takim të planifikuar me Ivanka Tramp, vajzën e presidentit të SHBA-së, e cila, së bashku me bashkëshortin e saj, janë shpallur investitorë strategjikë në Shqipëri.

Kryetari i Parlamentit, Niko Peleshi, tha në një postim në Fejsbuk se pjesëmarrja e Shqipërisë në Bordin e Paqes është "një angazhim i qartë i vendit për bashkëpunim dhe kontribut për paqen dhe sigurinë globale". sa/

Foto: Peleshi Fejsbuk