Shkup, 29 janar 2026 (MIA) - Zëvendëskryeministri dhe ministri i Transportit, Aleksandar Nikolloski njoftoi se Brukseli do të miratojë një Strategji të re për vizat e cila do të zgjidhë problemin e transportuesve të cilët për katër ditë kanë bllokuar vendkalimet kufitare drejt zonës Shengen.

"Sapo mora lajme të shkëlqyera nga Brukseli në lidhje me problemin e madh të transportuesve nga Maqedonia! Qëndrimet tona janë pranuar. Shoferët janë pranuar si profesionistë. Kjo është ajo që kërkonim. Pas protestave dhe ofensivës së fortë në periudhën e kaluar, Brukseli do të miratojë një Strategji të re për vizat që do të thotë zgjidhje e problemit me të cilin përballen shoferët profesionistë", shkruan Nikolloski në një postim në Fejsbuk, duke ndarë një pjesë të risive.

Nikolloski falënderon, siç thotë ai, të gjithë miqtë e Maqedonisë që ndihmuan me qëllim zgjidhjen e këtij problemi.

Vlerësimet fillestare të Odave janë se humbjet ditore për rajonin nga bllokadat e kufijve vetëm në eksportin arrijnë 100 milionë euro, ndërsa alarmohet edhe për pasojat e mungesës së disa produkteve të importuara.

Foto: arkivi i MIA-s