Gostivar, 11 dhjetor 2025 (MIA) - Nga koalicioni politik VLEN konfirmuan se në zgjedhjet e përsëritura për kryetar të Gostivarit kandidati i tyre do të jetë Nevzat Bejta. Ai sot, i shoqëruar nga simpatizantë dhe funksionarë të partive partnere të koalicionit, në KKZ Gostivar dorëzoi dokumentet dhe zyrtarisht u regjistrua si kandidat për zgjedhjet e përsëritura të caktuara për 11 janar.

Nga VLEN-i thonë se vendimi erdhi pas një procesi të brendshëm konsultimesh dhe sondazhe me qytetarët e Gostivarit.

"Bejta bindshëm ka rezultuar si zgjedhja më e besuar dhe më e preferuar. Qytetarët kanë vlerësuar përvojën e tij, projektet e realizuara dhe ndikimin pozitiv që ka pasur gjatë mandateve të mëhershme në krye të komunës", thonë nga VLEN-i. Nga atje thonë se Nevzat Bejta përfaqëson stabilitet, profesionalizëm dhe vizion për vazhdimin e zhvillimit të Gostivarit.

Nevzat Bejta mbrëmë përmes publikimit në rrjetet sociale njoftoi se në garën zgjedhore më 11 janar hynë si kandidat i VLEN-it. Ai falenderoi për besimin dhe njoftoi se do të punojë për të mirën e komunës dhe qytetarëve. 

"Gostivari është qytet i të gjithë qytetarëve. Të gjithë së bashku do të punojmë ta ndërtojmë dhe mendoj se do të kemi fitore të madhe më 11 janar, për të mirën e qytetit tonë. Siç e shoh nga disponimi i qytetarëve nga të gjitha kombësitë, ata mezi presin që të vijë 11 janari për të festuar fitoren", tha Bejta. 

Programi i ri parazgjedhorë bazohet në projekte në arsim, infrastrukturë dhe pastërtinë publike. 

Bejta gjatë karrierës politike në BDI ishte deputet, kryetar i Komunës së Gostivarit dy herë (nga viti 2005-2009 dhe 2013-2017), Nga partia amë në të cilën ishte nënkryetarë u shkëput së bashku me Izet Mexhitin dhe ishin pjesë e "grupit të zjarrit". qa/

Foto: VLEN