Shkup, 20 mars 2026 (MIA) - Zyrtarë policorë e kanë privuar nga liria drejtorin e Inspektoratit shtetëror për bujqësi V.A. (41) nga Koçani, i cili dyshohet se ka marrë rryshfet prej 50.000 eurove si këst të parë nga 100.000 euro gjithsej të kërkuara, kumtoi Ministria e Punëve të Brendshme. Kundër tij është parashtruar padi penale deri te PTHP për NKOK për veprën penale "marrje të rryshfetit" sipas nenit 357 nga Kodi penal.

Sipas informatave të MPB-së, i dyshuari, në cilësi të personit zyrtar, përmes spedicioneri në mënyrë indirekte kërkoi ryshfet nga pronari i një kompanie që merret me import. Ryshfeti ishte kërkesë për të mundësuar importimin e qetë të mallrave, për të cilat kishte vërejtje dhe mosrespektim të supozuar ligjor, për çka u hartua edhe raport nga Inspektorati.

Shuma e kërkuar prej 100.000 eurosh duhej të dorëzohej në tre pjesë, 50.000 euro në këstin e parë dhe dy këste nga 25.000 euro.

Arrestimi u bë dje, më 19 mars, kur u krye dorëzimi i këstit të parë prej 50.000 eurosh. Paratë fillimisht u morën nga spedicioneri, i cili më vonë duhej t'ia dorëzonte personit V.A.

"Pas marrjes së parave nga V.A., janë ndërmarrë masa dhe aktivitete operative taktike dhe bazuar në urdhrat e lëshuar, u krye kontroll i personit, automjetit dhe bagazhit. Gjatë kontrollit të një automjeti për udhëtarë, nën sediljen e bashkëudhëtarit, paratë u gjetën dhe u sekuestruan", njoftoi MPB. bsh/

Foto: MIA