Shkup, 15 dhjetor 2025 (MIA) – Me ndriçimin solemn të bredhit të Vitit të Ri dhe hapjen e Bazarit të Krishtlindjeve sonte në orën 18 në sheshin Maqedonia, zyrtarisht fillon programi festiv “Shkupi – përralla dimërore e Vitit të Ri”, i cili do të zgjasë deri më 31 dhjetor. 

Siç bëri të ditur kryetari i Qytetit të Shkupit, Orce Gjeorgjievski, qëllimi është që kryeqyteti të pozicionohet si metropol bashkëkohor evropian me përmbajtje të vazhdueshme dhe të larmishme festive për të gjitha gjeneratat. 

”Sot në orën 18:00, në zemër të qytetit në sheshin Maqedonia, do të ndizet në mënyrë ceremoniale pema e Vitit të Ri dhe do të hapet zyrtarisht Bazari i Krishtlindjeve, duke shënuar simbolikisht fillimin e ngjarjeve festive në kryeqytetin tonë. Me këtë ceremoni, Shkupi po bën një hap të rëndësishëm përpara drejt vizionit të zhvillimit krah për krah me qytetet moderne evropiane, duke krijuar ngjarje që sjellin energji pozitive, bashkim dhe gëzim për të gjitha gjeneratat tona”, tha Georgievski.

Në periudhën prej 15 deri më 31 dhjetor, ai theksoi se për çdo ditë nga ora 18, qytetarët do të mund të kënaqen në programin e pasur me ngjarje muzikore, dixhej dhe interpretime artistike, me çka theks të veçantë i është vendosur fëmijëve dhe familjeve. 

“Ne i kushtojmë rëndësi të veçantë fëmijëve dhe familjeve në Shkup. Për herë të parë, Shkupi ofron program të vazhdueshëm dhe të larmishëm festash për të gjithë bashkëqytetarët tanë. Çdo fundjavë, nga ora 12:00 deri në 14:00, përmbajtja i dedikohet plotësisht më të vegjëlve tanë, me animacione, punëtori krijuese, aktivitete interaktive dhe surpriza festive. Në orët e mbrëmjes, programi është i dedikuar për të rinjtë dhe të rriturit, duke krijuar atmosferë të ngrohtë dhe të gjallë festive”, tha Georgievski.

Pjesa qendrore e programit, shtoi, fillon më 27 dhjetor, në bashkëpunim me Lotarinë Shtetërore të Maqedonisë, me interpretime , festa dhe shpërblime festive, ndërsa në program, siç tha, do të marrin pjesë edhe bende të shkollave të mesme nga të gjitha shkollat e mesme në Shkup, duke theksuar se dëshira e tij këtë vit është që të gjitha interpretimet të jenë nga interpretues nga Maqedonia. 

“Kam vetëm një dëshirë këtë vit, dhe ajo është që të gjitha interpretimet të jenë nga interpretuesit tanë nga Maqedonia, sepse interpretuesit tanë nuk janë të famshëm vetëm në vendlindje, në Republikën e Maqedonisë, por janë të famshëm edhe jashtë kufijve tanë. Është më mirë kur janë këtu për Vitin e Ri dhe kur e festojmë Vitin e Ri së bashku, të gjithë në shesh”, tha Georgievski.

Nata e Vitit të Ri do të shënohet me interpretime nga interpretues muzikorë nga Maqedonia e Veriut, përfshirë Karolina Goçeva, Tamara Todevska, Mile Kuzmanovski, Ognen Zdravkovski, Kuku Lele, 2 Bona dhe të tjerë. Për më të vegjlit, nga 27 deri më 30 dhjetor, janë planifikuar programe për fëmijë, shfaqje teatrale, maskota dhe shpërndarje të pakove të Vitit të Ri, ndërsa më 27 dhjetor në orën 12:00, Baba Dimri do t'i mirëpresë fëmijët në shesh.

Në pyetjen e gazetarëve në lidhje me atë sa do të jetë shpenzimi i Qytetit të Shkupit, Georgievski tha se shpenzimi i vetëm për qytetin është zbukurimi, i cili, theksoi, është më pak se 70.000 euro. I pyetur nëse do të ketë interpretues shqiptarë, ai tha “muzika nuk njeh fe dhe komb” the bëri thirrje për bashkim, duke theksuar se programi është i dedikuar për të gjithë shkupjanet. 

“Kjo do të jetë ngjarje e madhe, me shumë yje të mëdha që nuk i kemi pasur në të njëjtin vend me vite. Do të jem këtu sonte, me të gjithë ju, dhe besoj se populli ynë në Shkup më në fund do të bashkohet pas shumë vitesh. Muzika nuk njeh fe, nuk njeh komb. Sheshi Maqedonia do të mbushet me biseda fëmijësh, me buzëqeshje fëmijësh, me njerëz të gëzuar, banorë të gëzuar të Shkupit pavarësisht fesë apo kombit, të cilët do ta festojnë festën së bashku me ne”, tha Georgievski.

 Përfaqësuesja e Lotarisë Shtetërore të Maqedonisë, Hristina Dimitrijevska, deklaroi se kompania është e kënaqur që mbështet ngjarjen si pjesë e përgjegjësisë së saj sociale korporative dhe se Lotaria Shtetërore në periudhën e kaluar ka ngritur konceptin e përgjegjësisë sociale korporative, duke mbështetur sportin, të rinjtë, mjedisin, arsimin, shkollat, kulturën dhe artin.

“Partneriteti me Qytetin e Shkupit për të organizuar këto ditë dhe mbrëmje të Vitit të Ri në sheshin Maqedonia është nder dhe kënaqësi për ne që mund të ndihmojmë në këtë aktivitet me qëllim përmbushjen e nevojave të argëtimit të Vitit të Ri, zhvillimit të artit dhe inkurajimit të kulturës vendase”, tha Dimitrijevska. fc/

Foto: MIA