Strugë, 5 mars 2026 (MIA) - Qeveria dhe Ministria e Mjedisit Jetësor dhe Planifikimit Hapësinor janë në dispozicion për të kapërcyer problemin me cilësinë e ujit në Strugë, tha ministri përkatës Muhamed Hoxha gjatë vizitës së sotme.

Pasi inspektoi zbatimin e projektit për zëvendësimin e tubave të azbestit në Strugë, ai theksoi se që nga dita e parë e problemit, Ministria ka qenë në komunikim të vazhdueshëm me Komunën e Strugës dhe po punon për të gjetur një zgjidhje të përhershme.

"Që nga dita e parë kemi qenë në komunikim me autoritetet komunale në lidhje me problemin e ujit të pijshëm. Inspektorët e Inspektoratit Shtetëror të Mjedisit Jetësor ishin në terren dhe arritën në përfundimin se burimi, në këtë rast ndërmarrja publike "Ujësjellës dhe Kanalizime", nuk ka lejen përkatëse për përdorimin e ujit. Janë dhënë udhëzime, është paraqitur kërkesa nga Komuna dhe do të ndiqen të gjitha rrugët ligjore për të arritur qëllimin", deklaroi Hoxha, duke theksuar se deri më tani nuk ka pasur asnjë diskutim për shpalljen e gjendjes së krizës.

Kryetari i komunës Mendi Qyra theksoi se për momentin komuna nuk ka nevojë për ndihmë financiare për të zgjidhur problemin e turbullirës së ujit, por përkundrazi se po punojnë në analiza se nga vjen turbullira.

Ai kujtoi se për të katërtën ditë radhazi, analizat e Qendrës për Shëndetin Publik nga mostrat nga ujësjellësi i qytetit tregojnë turbullirë brenda kufijve normalë, por rekomandimi për ndalim të pirjes mbetet për shkak të stabilizimit të burimit "Shum". sa/

Foto: MIA