Bruksel, 22 janar 2026 (MIA) - Jemi të gatshëm të bisedojmë me SHBA-në për marrëdhëniet dypalëshe, forcimin e bashkëpunimit dhe sigurinë në një "mënyrë më tradicionale politiko-diplomatike", por Danimarka ka vijat e veta të kuqe që nuk mund t'i negociojë, tha sonte kryeministrja daneze Mete Frederiksen pas mbërritjes në Samitin joformal të BE-së në Bruksel.

"Që në fillim e kemi theksuar se sovraniteti ynë është i panegociueshëm. Sigurisht, ne bashkëpunojmë me SHBA-në, siç kemi bërë gjithmonë, për sigurinë, por vijat tona të kuqe dhe rregullat e qarta demokratike janë të panegociueshme. Ne kemi bashkëpunuar shumë ngushtë për shumë vite, por duhet të bashkëpunojmë me respekt, pa kërcënuar njëri-tjetrin, dhe për këtë arsye shpresoj se do të gjejmë një zgjidhje politike si aleatë", shtoi Frederiksen.

Frederiksen falënderoi "të gjithë Evropën" në emër të Danimarkës dhe Grenlandës për gjithë mbështetjen që po marrin, duke theksuar se kjo ka treguar se kur Evropa nuk është e ndarë, kur qëndron e bashkuar dhe kur është e qartë dhe e fortë në prezantimin e asaj për të cilën përfaqëson, atëherë rezultatet janë të dukshme.

"Kjo ishte jashtëzakonisht e rëndësishme në këtë situatë shumë të vështirë në të cilën ndodhemi. Mendoj se kemi mësuar diçka gjatë ditëve dhe javëve të fundit dhe tani sigurisht që duam të gjejmë një zgjidhje", tha Frederiksen.

Ajo theksoi se NATO-s i është kërkuar të "jetë më e pranishme në rajonin e Arktikut", duke shtuar se të gjithë në Aleancë pajtohen se prania e saj e përhershme në Arktik, përfshirë edhe zonën përreth Grenlandës, është e nevojshme. sa/

Foto: Printskrin