EvropëEvropë.PortalSvet.Slajder

Gjermania kërkon lirimin e protestuesve të arrestuar në Bjellorusi

Ministri i Punëve të Jashtme të Gjermanisë, Hajko Mas u ka bërë thirrje autoriteteve bjelloruse që menjëherë t'i lirojnë protestuesit e arrestuar dhe gazetarët, të cilët sipas tij "protestonin paqësisht duke i përdorur të drejtat e tyre demokratike".

Berlin, 11 gusht 2020 (MIA) – Ministri i Punëve të Jashtme të Gjermanisë, Hajko Mas u ka bërë thirrje autoriteteve bjelloruse që menjëherë t’i lirojnë protestuesit e arrestuar dhe gazetarët, të cilët sipas tij “protestonin paqësisht duke i përdorur të drejtat e tyre demokratike”.

“Do t’ju kujtoj se Bashkimi Evropian i hoqi sanksionet kundër Bjellorusisë, sepse premtoi se do t’i lirojë të burgosurit politikë. Sidoqoftë, ne do të vazhdojmë ta monitorojmë nga afër situatën”, theksoi Mas.

Ai shtoi se BE do ta rishqyrtojë vendimin për heqjen e sanksioneve.

Sipas një burimi diplomatik anonim më 27 dhe 28 gusht në Bruksel do të mbahet takim joformal i ministrave të jashtëm të BE-së ku në spikamë do të jetë tema e reagimit të BE-së ndaj ngjarjeve në Bjellorusi pas zgjedhjeve presidenciale.

Më parë, Ministria e Punëve të Brendshme e Bjellorusisë kumtoi se janë arrestuar rreth  2,000 qytetarë të pakënaqur, ndërsa 21 policë u plagosën gjatë protestave, pesë prej të cilëve janë shtruar në spital.

 Kandidatja opozitare në zgjedhjet presidenciale të Bjellorusisë, Svetllana Tihanovskaja sot konfirmoi se ka marrë “vendim të rëndë” ta braktisë vendin, ku bëhet shtypje ndaj lëvizjes protestuese pas zgjedhjeve kontestuese presidenciale të së dielës.

Në Bjellorusi mbrëmë, natën e dytë me radhë, policia i dëboi demonstrantët të cilët protestuan kundër fitores zgjedhore të Lukashenkos i cili është në pushtet nga viti 1994.  

Protestat dhe përleshjet me policinë filluan të dielën natën, pas publikimit të rezultateve paraprake të zgjedhjeve presidenciale ku Lukashenko fitoi më shumë se 80 për qind të votave dhe e fitoi mandatin e tij të gjashtë. ls/fab

Таг
Back to top button
Close
Close