0_Македонија.ПорталОпштествоПолитика

Царовска на средба со универзитетски професори: Реформата во основното образование е неопходна

Министерката за образование и наука Мила Царовска денеска оствари средба со универзитетски професори во врска со предложената нацрт-концепција за основно образование.

Скопје, 27 јануари 2021 (МИА) – Министерката за образование и наука Мила Царовска денеска оствари средба со универзитетски професори во врска со предложената нацрт-концепција за основно образование.

Царовска по средбата во изјава за медиумите нагласи дека на средбата било заклучено оти оваа реформа ќе направи значителен исчекор во подобрување на квалитетот на основното образование.

– Навистина конструктивни коментари, позитивно насочени професори кои веруваат во тоа дека оваа реформа ќе направи значителен исчекор во подобрување на квалитетот на основното образование, а со тоа понатаму ќе се направи притисок и за другите нивоа на образование да станат подобри, се со цел да имаме понатаму граѓани кои во себе ги имаат и ги живеат граѓанските вредности, но исто така имаат и и знаења и компетенции со кои стануваат конкурентни на пазарот во светот, но притоа придонесуваат за развој на нашата држава, нагласи Царовска.

Емилија Петрова Ѓорѓева, декан на Педагошкиот факултет од Штип при Универзитетот Гоце Делчев истакна дека сите се сложни во едно, а тоа, како што рече, е дека секое време носи свои предизвици и дека ваква реформа е неопходна.

– Оваа концепција е поставена на современи сфаќања, е многу амбициозна и се потпира на европски документи. Во концепцијата се дадени контурите на нештата кои ни даваат насоки и акција како да делуваме понатаму. Мислам дека во тие насоки и таа акција ако се вклучат сите чинители на воспитно образовниот процес ќе дадеме придонес за подобрување на оваа концепција се во интерес на нашите ученици, рече Петрова Ѓорѓева.

Славчо Димитров од Универзитетот ФОН посочи дека иницијативата со оваа концепција и реформите се за поздрав и оти ова е процес во кој треба да бидат вклучени сите одговорни актери, особено академската заедница.

– Она што оваа концепција и реформа сака да го направи и што е јасно, недвосмислено, содржано во текстот на коцептот е дека учениците мора да станат фокусот, нивните потреби да бидат центарот на воспитно образовниот процес, мора да се трансформира начинот на кој е структуриран тој процес, да се променат содржините и методологиите. Сметам дека најголемата придобивка на концепцијата е воведувањето на интер или трансдиспиплинарната перспектива или она што се нарука интегрираните предмети преку кои македонското образование конечо ќе влезе во чекор со современите, релевантните, научни и светски образовни текови во кои различните дисциплини се во дијалог, се надоградуваат, вели Димитров.

Според Мимоза Ристова, професор по физика на Природно математичкиот факултет во Скопје концептот овозможува добра реализација, а тие будно ќе набљудуваат како ќе се спроведува. Додаде оти ќе помагаат да се мерат ефектите од реформата и да се подобруваат начините за нејзино спроведување.

Министерката Царовска додаде дека доаѓаат при крајот на овие дебати со специфично целни групи, но, како што информира, следува и јавна дебата која ќе се случува во Собранието каде сите засегнати страни ќе бидат повикани од сите релевантни институции да го кажат своето мислење за да може да ја заокружат дебатата и текстот да го заземе својот конечен изглед. мс/са/

 

Провери го и ова

Close
Back to top button
Close
Close